Papa takohet me Jean Todt dhe lutet për Michael Schumacher

Papa Françesku priti dje në Vatikan, Jean Todt, presidentin e Federatës Ndërkombëtare të Automobilave (FIA), ish-administrator i deleguar i Ferrari-t, tani, i dërguar i veçantë i Kombeve të Bashkuara për Sigurinë Rrugore. U fol edhe për gjendjen shëndetësore të pilotit të njohur të Ferrar-it, Michael Schumacher. Të dëgjojmë vetë Jean Todt, në mikrofonin tonë:

         E pyeta Papën nëse donte të lutej për të dhe ai pranoi me dëshirë. Ishte ditë e bukur, e ngjeshur: në të vërtetë, erdhëm kryesisht për të folur mbi sigurinë rrugore e takimi qe pozitiv. E zgjerova diskutimin, duke përfshirë subjektet që më interesonin e natyrisht, Michael Schumacher-in e kam për zemër, siç e dinë të gjithë: është i familjes. Përveç Schumacher-it, i treguam Papës filmin e Luc Besson, “Save Kid’s Lives”(Shpëtoni jetën e fëmijëve), i cili i bëri shumë përshtypje. E informuam se çdo ditë, 500 fëmijë vdesin në aksidente rrugore, ndërsa 20 mijë të tjerë plagosen. Çdo vit, në rrugë e përfundojnë jetën 1,3 milion njerëz, ndërsa 50 milion të tjerë plagosen. Janë shifra, që nuk njihen edhe aq. E Papa pranoi menjëherë të nënshkruante disa “simbole” të rëndësishme, të cilat do t’i përhapim në të gjithë botën. Pastaj, na premtoi të na shoqërojë me lutje.