Sot, më 10 janar, kalendari kishtar përkujton Shën Agatonin, Papë. Shën
Agatoni u ul në fronin e papnisë më 26 qershor të vitit 678, pikërisht kur kishte
mbushur 103 vjet, duke qenë krejtësisht i kthjelltë. Më 12 gusht mori nga perandori
Kostantin Pagonati një letër, përmes së cilës deklaronte se ishte gati të rifillonte
përpjekjet për të realizuar planin e ribashkimit kishtar të Romës me Bizantin. Mendonte,
prandaj, të mblidhte një konferencë Ipeshkëvnore, në të cilën të diskutoheshin problemet
më urgjente, që do të çonin në zhdukjen e kundërvënieve, duke i hapur përfundimisht
rrugën bashkimit. Për këtë qëllim perandori i kërkonte papës të dërgonte disa përfaqësues
të tij në Kostandinopojë. Për të përgatitur delegacionin, Agatoni mblodhi më 27 mars
të vitit 680 në Lateran një koncil italian, i cili zgjodhi përfaqësuesit ipeshkëvnor
që do të niseshin për në Bizant së bashku me të dërguarit e papës dhe miratoi tekstin
sinodal, që do të paraqitej në konferencë. Në këtë tekst pasqyrohej doktrina e dy
vullneteve dhe e dy mënyrave të veprimit të Krishtit, duke kujtuar atë që ishte vendosur
në Koncilin Lateranens nga Martini I.
Delegacioni perëndimor arriti në Bizant më 10 shtator të vitit 680 dhe u prit nga
patriku Gjergj, që mori masat për të mbledhur metropolitët dhe ipeshkvijtë Bizantinë.
Ajo që u thirr thjeshtë si konferencë, mori pamjen e një Koncili të vërtetë, i gjashti
në Lindje. Mbledhja u hap më 17 nëntor të vitit 680 në sallën e madhe të pallatit
perandorak. Kryetar i saj ishte vetë perandori, që kishte përkrah dy priftërinj e
një diakon romak, si përfaqësues të papës. Ndërsa në Itali shpërtheu epidemia e murtajës,
që shkaktoi vdekjen e një numri të madh njerëzish, në Kostandinopojë koncili vijonte.
Pas 18 seancash u arrit në hartimin e një dekreti që u shpall më 16 shtator të vitit
681. Në të ripohohej besojma e fesë, e vendosur nga pesë koncilët e mëparshme dhe
miratohej njëzëri doktrina e dy vullneteve dhe dy energjive të Krishtit, që nuk ishin
në kundërshtim me to, duke konfirmuar edhe tekstin sinodal të Lateranit. U dënua edhe
herezia monoteistike.
Koncili u mbyll me kërkesën drejtuar papës për të miratuar vendimet e marra. Por Agatoni
kishte vdekur më 10 janar të vitit 681 dhe ishte varrosur në Bazilikën e Shën Pjetrit.
Gojëdhëna tregon se kur i mbylli sytë, ishte 107 vjeç. Agatoni nënshtroi edhe kryeipeshkvin
e Ravenës, Teodorin, i cili i dha fund autoqefalisë së dënuar nga Roma. U interesua
shumë edhe për fatet e Kishës anglosaksone. Magjisteri i tij shquhet për thellësinë
e doktrinës dhe bamirësinë në ndihmë të të varfërve. Është pajtori qiellor i Palermos.
All the contents on this site are copyrighted ©. |