Չորեքշաբթի 6 Յունուար 2016-ի առաւօտեան ժամը 10:30-ին, Աստուածայայտնութեան տօնին
առթիւ, Զմմառու Պատրիարքական Միաբանութեան Փոխանորդ և Մեծաւոր վանքիս՝ Գերպծ. Հ. Գաբրիէլ
Թ.Ծ.Վ. Մուրատեան Ձայնաւոր Ս. Պատարագ մատուցանեց Զմմառու Վանքի Մայր Տաճարին մէջ: Ս.
Պատարագին ներկայ գտնուեցան Զմմառու վանքի վարչական Հայրերը, Ս. Միքայէլ և Երանելի Մալոյեան
դպրեվանքի ուսանողները և բարեպաշտ հաւատացեալներ:
Գերապայծառ Հայրը իր քարոզին մէջ նշեց թէ Աստուածայայտնութեան տօնը, Հայ Եկեղեցւոյ հինգ
տաղաւար տօներէն առաջինն է և Բ. դարէն սկսեալ՝ մեծ շուքով կը տօնակատարուի: Մեծաւորը,
անդրադառնալով օրուան խորհուրդին, ըսաւ. «Այսօր Բանը որ կը բնակէր երկնքի մէջ, աշխարհ
իջաւ, մարդոց մէջ բնակեցաւ, որպէսզի մենք լսենք իր խօսքը եւ շօշափենք Աստուծոյ սէրը»:
Ապա Մեծաւոր Հայրը իր քարոզին մէջ խօսելով ստեղծագործութեան և Քրիստոսի աստուածայայտնութեան
խորհուրդին մասին՝ մէջբերեց Սրբազան Քահանայապետին քարոզէն հետեւեալ հատուածը. «Բանը
Աստուած է և Աստուած լոյս է, սակայն մարդիկ նախընտրեցին խաւարը։ Բանը եկաւ իրեններուն
մօտ, սակայն անոնք զինք չ'ընդունեցին։ Չարը առեղծուած մըն է որ մեր կեանքին կը սպառնայ,
իսկ մեզմէ կը պահանջուի հսկողութիւն` որպէսզի ան չիշխէ մեր վրայ: Պէտք է զգուշանալ չարէն
ու բանալ մեր սրտերուն դռները Աստուծոյ Խօսքին, որպէսզի Անոր որդիները դառնանք»:
Սուրբ և Անմահ Պատարագի աւարտին՝ մեր Տիրոջ Յիսուսի Քրիստոսի Մկրտութիւնը խորհրդանշող
Ջրօրհնէքի արարողութիւնը տեղի ունեցաւ տարիներու աւանդութեան համաձայն: Պատարագիչ Հայրը
աղօթքէն և հոգեպարար շարականի երգեցողութենէն ետք, սրբալոյս միւռոն հոսեցուց Քրիստոսի
Մկրտութիւնը և Յորդանան գետը խորհրդանշող ջուրի աւազանին մէջ: Այնուհետեւ օրհնուած ջուրը
բաժնուեցաւ հաւատացեալ ժողովուրդին: Սրբազան արարողութեան աւարտին՝ հոգեւորական և դպրաց
դասն ու հաւատացեալները հանդիսաւոր թափօրով ուղղուեցան վանքիս դահլիճը, ուր Տնօրհնէք
կատարուեցաւ: Որմէ ետք յաւուր պատշաճի հիւրասիրութիւն տեղի ունեցաւ և փոխադարձ մաղթանքներ
կատարուեցան:
All the contents on this site are copyrighted ©. |