BEATI QUI CREDIDERERUNT
Lum ata, që besuan!
Arrijmë para kornizës së skenës së XIII të Portës Shenjte të Bazilikës së Shën Pjetrit. Eshtë skena e dyshimit. Njëkohësisht, e besimit pa kushte. Skena e Tomës, dyshimtarit… Hyjmë në të, për të përforcuar fenë tonë e besimin tonë. Njihemi nga afër me Tomën, i cili, megjithëse ishte apostull, fillimisht nuk e besoi historinë e mrekullueshme të mëshirës e të faljes: për të gjithçka kishte përfunduar mbi kryq! E kështu vijon të mendojë shumëkush. Ndoshta-ndoshta edhe ndonjëri, që kapërcen këtë çast Portën Shenjte.
Por, duke vijuar shtegtimin në këtë skenë, bindemi se, përkundrazi, gjithçka fillon nga Kryqi. Fillon një histori e pakundërshtueshme dashurie, që e kërkon Palin në rrugën e Damaskut; i flet Françeskut të Asizit në kishën e varfër të Shën Damianit; vulos me plagë trupin e Atë Pios në korin e kishës së Kapuçinëve të Shën Giovanni Rotondos e vijon të trokasë në portën e shumë zemrave, edhe të zemrave tona, duke shkaktuar shndërrime të mrekullueshme. Ashtu siç i ndodhi San Girolamo Emilianit, Charles de Foucauld; të dënuarit me gijotinë, Jacques Fesch, Giovanni Papinit, Curzio Malapartes, Leonardo Mondadorit, Klaudias Koll… e shumë e shumë shpirtrave të tjerë, që ia hapën portën e zemrave Jezu Krishtit.
Hyjmë në skenë së bashku me Tomën, menjëherë pas Pashkëve, si aktorë të kësaj historie të mrekullueshme feje, që e shndërron jetën. Duke parë plagën e gozhdave e edhe të çarën e lënë nga heshta në kraharorin e Jezusit, ai brohoret: “Zoti im e Hyji im!(Gjn 20,28).
Shën Gregori i Madh e komentoi kështu ngjarjen; “Mirësia e pambaruar e Zotit vendosi që ky dishepull dyshimtar, duke prekur mbi korpin e Mjeshtrit vragët e plagëve, të shëronte plagët e mosbesimit tonë. Në të vërtetë ne, në dyshimin e Tomës, më shumë se në fenë e besimtarëve, gjejmë një arsye më shumë për të besuar” (Homelia 26,4-7).
E ashtu qoftë!
Të lutemi:
O Tomë,
apostull i dyshimit
por edhe i përvujtërisë
që çel gonxhen e fesë
së bindur e bindëse,
lutu për ne
që duke parë plagët
e Krishtit të Kryqëzuar,
të mund të brohorasim sot:
“Zoti im e Hyji im,
Sa shumë më deshe!”
Amen!
All the contents on this site are copyrighted ©. |