Հայոց ցեղասպանութեան հարիւրամեակի յիշատակումի փակում"
Նշանակալի՜ տարի մը եղաւ 2015 ը։ Արդէն իսկ իր լրումին կը հասնի։
Թորոնթոյի Սուրբ Գրիգոր Լուսաւորիչ Հայ Կաթողիկէ եկեղեցւոյ երգչախումբի կազմակերպութեամբ,
տեղի ունեցաւ "Հայոց Ցեղասպանութեան Հարիւրամեակի Յիշատակումi Փակումը"։
Կիրակի 20 Դեկտեմբեր 2015 առաւօտեան ժամը 11:00 ին՝ հաւատացեալներու հոծ բազմութիւն
մը ջերմեռանդութեամբ, խորին երկիւղածութեամբ հետեւեցան Սուրբ և անմահ պատարագի արարողութեան,
զոր մատուցանեց եկեղեցւոյս Ժողովրդապետ՝ Հայր Եղիա Ծ. Վրդ.Գիրէջեան։
Չափազանց յուզիչ ու խորհրդաւոր էին դասին մէջ զետեղուած սրբապատկերները՝ Երանելի Իգնատիոս
Արքեպիսկոպոս Մալոյեանի և 1.5 միլիոն սրբադասուած նահատակներունը։
Յաւարտ Ս.պատարագին, ղեկավար՝Մայէսթրօ Եսայի Սարգիսեան ողջունեց ներկաները եւ հակիրճ
կերպով ներկայացուց օրուան պատգամը ։
Մխիթար Աբբահօր "Աղաչեմ զՔեզ"շարականով սկիզբ առաւ երգչախումբին հանդիսութիւնը, դաշնակի
ընկերակցութեամբ ազնուափայլ Տիկին Լենա Նահաս–Եօզկատլեանի ինչպէս նաեւ սրինգի մեղրածոր
ձայնով ընկերակցութեամբ Օրդ. Էլիզապէթ Սագարեանի։
Դոկտ.Պերճ Մինասեան բծախնդրութեամբ տուաւ բացատրականը երեք նշանաւոր Հայորդիներու, որոնց
ծննդեան թուականները դիպուածաբար տեղի ունեցած են միեւնոյն տարեշրջանին` 1869 ին. Ինքնատիոս
Արքեպ. Մալոյեանին, Կոմիտաս վարդապետին եւ Յովհաննէս Թումանեանին։
Դոկտ. Մինասեան աննման ապրումով ասմունքեց Պարոյր Սեւակի Անլռելի Զանգակատունէն հատուած
մը` Ղօղանջ բանաստեղծութիւնը։
Շնորհիւ Մայէսթրօյին հմտութեան, երգչախումբի անդամները հոգեթով երգերու փունջով՝ հմայեցին
ներկայ խուռներամ հաւատացեալները, յաջորդաբար կարգով ներկայացնելով "Երանելի Մալոյեանին"
երգը, խօսք՝ Անրանիկ վրդ.Կռանեանի, Երաժշտութիւն՝ Եդուարդ Թորիկեանի, Մակար Եկմալեանի`
"Տէր կեցո Դու զհայս" Կոմիտասի՝ "Ամէն հայի սրտից բխած" խմբերգերը։ Մէջ ընդ մէջ հերթական
ընթերցումներով իրենց մասնակցութիւնը բերին Խորանի ծառայող սպասաւորներն ու սարկաւագները։
"Ազգ Փառապանծ" ազգաշունչ երգով վերջ գտաւ երգչախումբին ելոյթը արժանանալով բոլորին
բուռն ծափողջոյններուն որմէ ետք՝ Հայր Եղիա Ծ.վրդ.Գիրէջեան իր սրտի խօսքը փոխանցեց գնահատելով
երգչախումբը իր բարձրորակ կատարումով, շնորհակալութիւն յայտնեց բոլորին և յատկապէս յայտագրի
բաժին վերցնող անդամ անդամուհիներուն, բարձր առնելով անոնց ճիգերն ու զոհողութիւնները
։
Պահպանիչի օրհնութեամբն ներկայ հաւատացեալները մեկնեցան մեծ գոհունակութեամբ , մեր
սրբացեալ նահատակներու յիշատակը սերունդէ սերունդ պահելու վճռակամութեամբ։
Օրդ. Ժանէթ Աբրահամեան
| All the contents on this site are copyrighted ©. |