Каментуючы прысуджэнне Святому Айцу Міжнароднай прэміі імя Карла Вялікага, кіраўнік Залы Друку Апостальскай Сталіцы кс. Фэдэрыка Ламбардзі нагадаў, што папа Францішак раней ніколі не прымаў прэмій і ўзнагарод, прызначаных яго асобе. Такім чынам гаворка ідзе пра выключную падзею.
У размове з ім, Пантыфік заўважыў, што бачыць у прысуджэнні прэміі нагоду для таго, каб яшчэ раз сказаць аб міры, каб супольна маліцца аб міры, каб заклікаць Еўропу да дзейнасці на карысць міру, як унутры сваіх межаў, так і ва ўсім свеце.
Іншым значным аспектам сёлетняй Міжнароднай прэміі імя Карла Вялікага з’яўляецца той факт, што яна была ўпершыню прысуджана асобе, якая не паходзіць з Еўропы. Паводле кс. Ламбардзі, такім чынам быў адзначаны заклік Святога Айца аб глабальным пакліканні Еўропы, скіраваны з трыбуны Еўрапейскага парламента. Папа нагадаў еўрапейцам аб неабходнасці дзейнасці на падставе каштоўнасцяў павагі да чалавечай асобы, салідарнасці з усімі народамі, будавання міру – каштоўнасцяў, на якіх нарадзілася ідэя адзінай Еўропы. Папа паказвае еўрапейскаму кантыненту яго больш глыбокае і шырокае пакліканне, пераканы кіраўнік Залы Друку.
Кс. Ламбардзі нагадаў, што Ян Павел ІІ, які атрымаў Міжнародную прэмію імя Карла Вялікага ў 2004 г., таксама быў “вялікім Папам міру”, натхняльнікам Еўропы з “двума лёгкімі”, прымірэння, адзінства паміж усходам і захадам.
All the contents on this site are copyrighted ©. |