(Ռատիօ Վատիկան) Տառապող եկեղեցւոյ օգնութիւն վատիկանեան մարդասիրական կազմակերպութիւնը 19 ծրագիրներ իրագործած է Սուրիոյ եւ Իրաքի քրիստոնեայ գաղթականներուն ի սպաս անոնց բաշխելով սնունդ, դեղորայք, ապաստան ու հոգեւոր ներկայութիւն։
2014էն մինչեւ այսօր վատիկանեան այս հիմնարկը ծախսած է 15 միլիոն եւրօ Իրաքի քրիստոնեայ գաղթականներուն ի նպաստ մինչ Սուրիոյ մէջ 2011էն այսօր ծախսած է 9 միլիոն եւրօ։
Միջին Արեւելքի պատասխանատու հայր Հալեմպայի գնահատումով ''Տառապող եկեղեցւոյ օգնութիւն'' կազմակերպութիւնը միակ մարմինն է որ օգնութեան կը հասնի Միջին Արեւելքի քրիստոնեաներուն։ Նոր ծրագիրներու շարքին ''Տառապող եկեղեցւոյ օգնութիւն'' կը նպատակադրէ մանկամսուր կառուցանել 125 մանուկներու համար որոնք ապաստան գտած են Պաղտատ։
2014-ին վերոյիշեալ մարմինը Քիւրտիստանի մէջ կառուցած է 8 դպրոցներ ուր կը յաճախեն աւելի քան 7·000 մանուկներ։
Մարդասիրական այս կազմակերպութիւնը դրամական օգնութիւն կը շնորհէ նաեւ 182 ընտանիքներու ։ Էրպիլի առաջնորդին գնահատումով Տառապող եկեղեցւոյ օգնութիւն բերած սատարը վճռական ու կենսական եղաւ եկեղեցւոյ համար։ Նոյնն է նաեւ Սուրիոյ պարագային։ Հոմս քաղաքին մէջ ''Տառապող եկեղեցւոյ օգնութիւն'' հաստատութիւնը առօրեայ կերակուր կը բաշխէ 4500 արտահան ընտանիքներուն իսկ Մարմարիդաˋ հովիտը ապրող քրիստոնեաներուն` դպրոցական ծախսերը կը հոգայ։ Յայտնենք նաեւ թէ Տառապող եկեղեցւոյ օգնութիւն հաստատութիւնը ինքնաշարժ շնորհած է Սալեզեան կրօնաւորուհիներուն որոնք նուիրումով կը ծառայեն Դամասկոսի իտալական հիւանդանոցին մէջ։
All the contents on this site are copyrighted ©. |