2015-12-10 10:50:00

Ֆրանչիսկոս Պապին ցաւակցական նամակները ի լուր երկու կարդինալներու մահուան։


(Ռատիօ Վատիկան) Հինգշաբթի 10 դեկտեմբեր 2015-ին,  Ֆրանչիսկոս Սրբազան Քահանայապետը երկու ցաւակցական հեռագիրեր ուղղեց մէկը Սանթա Քրուզ Տէ Կա Սիերրայի թեմի առաջնորդին եւ միւսը Կարդինալական Դասի աւագերէցին ի լուր Սանթա Քրուզ Տէ Կա Սիերրայի թեմի երբեմնի առաջնորդ` Կարդինալ Թերրազասի եւ Սուրբ Պետրոս պազիլիքայի երբեմնի աւագերէց` Կարդինալ Ֆուրնոյի մահուան։

Իր յղած նամակներուն մէջ Սրբազան Քահանայապետը իր ցաւակցութիւնները յայտնեց մեծարելով երկու ծիրանաւորներու յիշատակը ու անոնց տքնաջան ծառայութիւնը ի սպաս եկեղեցւոյ եւ Աստուծոյ ժողովուրդին։

Նորին Սրբութիւնը ապա ապահովեցուց իր աղօթքները ննջեցեալներու հոգւոյն հանգստեան համար ու շնորհեց իր առաքելական օրհնութիւնը բոլոր անոնց որոնք կ՛ողբան երկու ննջեցեալ կարդինալներու մահը որոնք իրենց հոգին յանձնեցին առ Հայր` չորեքշաբթի 9 դեկտեմբերին.

Երջանկայիշատակ Կարդինալ Խուլիօ Թերրասզաս Սանտովալը ծնած էր 7 մարտ 1936-ին Վալլեկրանտի մէջ։ Կրօնաւորական ուխտերը կատարած էր 1957-ին։ Քահանայ ձեռնադրուած էր 29 յուլիս 1962-ին։ Եպիսկոպոս նշանակուած է 15 ապրիլ 1978-ին եւ նոյն տարուայ 8 յունիսին ստացած էր եպիսկոպոսական օծումը։ 1985-ին ընտրուած էր Պոլիվիայի եպիսկոպոսական համահաւաք դասի նախագահ ապա նոյն պաշտօնի վրայ վերընտրուած է 1988-ին եւ 2006էն մինչեւ 2012։  Կարդինալական տիտղոսին արժանացած է Սուրբ Յովհաննէս Պօղոս Բ օրով ` 21 փետրուար 2001-ին։

Կարդինալ Քարլօ Ֆուրնոն, ծնած էր 2  դեկտեմբեր 1921-ին Իտալիոյ Իվրէա թեմին մէջ։ Քահանայ ձեռնադրուած էր 25 յունիս 1944-ին։ 1962-էն սկսեալ ծառայած էր Սուրբ Աթոռի Պետական Քարտուղարութեան ներքոյ եւ 1973-ին Պօղոս Զ Քահանայապետի օրով նշանակուած է Փերուի առաքելական նուիրակ ստանալով Արքեպիսկոպոսական տիտղոսը։ 1978-ին եղած է Լիբանանի մօտ առաքելական նուիրակ եւ 1982-ին Պրազիլի մօտ սուրբ աթոռի դեսպան։ 1992-ին վերադարձած է Հռոմ որպէս Իտալիոյ մօտ առաքելական դեսպան։ Կարդինալական տիտղոսը ստացած է Սուրբ Յովհաննէս Պօղոս Բ օրով 26 նոյեմբեր 1994-ին

Կարդինալ Խուլիօ Թերրազասի եւ Կարդինալ Ֆուրնոյի մահով Կարդինալական դասի ընդհանուր թիւը կ՛իջնէ 216-ի, որոնցմէ 117-ն Քահանայապետ ընտրելու իրաւունքով Կարդինալներ,  իսկ 99-ն` 80 անց եւ վաստակաւոր կարդինալներ որոնք իրաւունք չունին մասնակցելու Քահանայապետի ընտրաժողովին։








All the contents on this site are copyrighted ©.