Սպիտակի մէջ երկրաշարժի հետեւանքներու վերացման մասնակցած զինուորներուն նուիրուած յուշարձան

Սպիտակ քաղաքի մէջ նախօրէին բացուած է 1988 թուականի երկրաշարժի հետեւանքներու վերացման աշխատանքներուն մասնակցած զինուորներուն նուիրուած յուշարձան:

ՀՀ մշակոյթի նախարարութեան լրատուական ծառայութեան տեղեկութիւններով` յուշարձանի բացման արարողութեան ներկայ եղած են ՀՀ մշակոյթի նախարար Յասմիկ Պօղոսեանը, ՌԴ մշակոյթի նախարարի տեղակալ Գրիգորի Փիրումովը, ՀՀ-ի մէջ ՌԴ արտակարգ եւ լիազօր դեսպան Իվան Վոլինգինը, Սպիտակի քաղաքապետ Գագիկ Սահակեանը, «Սպիտակի յուշարձան» ՀԿ-ի ղեկավար Նորայր Մուրատեանը, որ մասնակցած է երկրաշարժի հետեւանքներու վերացման աշխատանքներուն:

Խօսելով 1988-ի Դեկտեմբեր 7-ի արհաւիրքին մասին նախարար Յ. Պօղոսեանը նշած է. «Որքան էլ Սպիտակի երկրաշարժից ժամանակ անցնի, մենք միշտ յիշելու ենք մեր անմեղ զոհերին: Միեւնոյն ժամանակ չենք կարող մոռանալ այն ձեռքերը, որոնք մեկնուեցին հայ ժողովրդին` օգնութեան ձեւով: Այս յուշարձանի բացումը կարեւոր իրադարձութիւն է, մեր շնորհակալութիւնը` սովետական զինուորներին»:

Իր խօսքին մէջ նախարարը նաեւ շնորհակալութիւն յայտնած է իր գործընկերոջ` ՌԴ մշակոյթի նախարար Վլատիմիր Մետինսքիին, գործընթացի դժուարութիւնը իր ուսերուն վերցնելու համար:

Նշենք, որ յուշարձանը ստեղծուած է Մոսկուայի մէջ` Ռուսական ռազմապատմական միութեան նախաձեռնութեամբ եւ ֆինանսաւորուած է Ռուսաստանի կողմէն: Երեխայի հետ զինուորի պրոնզէ քանդակը (բարձրութիւնը 3.5 մեթր) ստեղծուած է ճարտարապետ Վատիմ Ֆրոլովի ղեկավարութեամբ, քանդակագործն է Ալեքսանդր Միրոնովը, ձեւաւորողը` Սոֆիա Շլէոնգինան: