Më 1 dhjetor kalendari kishtar kujton Shën Naumin, profet.
Libri biblik, që njihet si i Naumit profet e që është i 41-ti i Besëlidhjes së
Vjetër, vjen menjëherë pas atij të Mikesë e i paraprin Librit të Abakukut.
Rreptësia me të cilën shprehet Naumi, buron nga mendësia e nga atmosfera e Besëlidhjes
së Vjetër. Për këtë profet, që njihet si i shtati ndërmjet Profetëve të vegjël, dihet
pak e aspak. Nuk dimë me siguri kur, ku e si jetoi. Mendohet të ketë lindur në gjysmën
e shekullit VII para Krishtit, ndoshta në kohën ndërmjet rënies së Tebës (663 p. K.)
e të Ninives (612 p K.) në duart e ushtrive babiloneze e persiane. Sipas Shën Jeronimit,
duhet të ketë lindur në fshatin Elkos të Galilesë. Në Librin e tij profetik, me tre
kapituj, ai përshkruan rrenimin e kryeqytetit asir Ninive, rënë në vitin 612 p.K.
pas sulmeve të mbretit të Medëve Ciasarit e të Nabukodonozorit, themelues i dinastisë
së re babiloneze.
Kënga profetike e Naumit i kushtohet krejtësisht rënies e rrënimit të Asirisë, kundërshtares
së madhe të Izraelit. Profeti i bën një gjëmë sarkastike, duke u shtirë sikur qan
e mban zi për këtë fund. Ndërsa në të vërtetë ironizon e shpreh kënaqësinë e tij të
thellë për këtë vepër drejtësie, të kryer nga dora e Zotit, kundër një armiku kaq
të egër e mizor, nën thundrën e të cilit kishte vuajtur aq shumë Izraeli.
Me këtë këngë, rënia e Ninives bëhet simbol i fitores së madhe të Hyjit mbi të keqen,
gjë që ngjall shpresa të reja në zemrën e njerëzve të shtypur të të gjitha kohëve,
sepse në rënien e Ninives, shikojnë qartë se herët a vonë, dora e Zotit do të rëndojë
mbi çdo të keqe, që mundon njeriun e drejtë.
Ashtu ndodh edhe me Teben, qytetin gjakatar, që u ngrit mbi gjak e u mbyt në gjak.
Në përfundim Naumi profetizon: “Nuk mund të ndërtohen mbretëri të qëndrueshme mbi
bazën e forcës, të prepotencës, të mbrapshtive, sepse Zoti është i ngadalshëm në zemërim,
por në fund të fundit i ndëshkon me krah të shpërvjelur të gjithë ata, që guxojnë
t’i kundërvihen urdhërimeve të Tij”.
All the contents on this site are copyrighted ©. |