Եպիսկոպոսական օծում Սուրբ Գրիգոր Լուսաւորիչ Սուրբ Եղիա Աթոռանիստ եկեղեցւոյ մէջ

 (Ռատիօ Վատիկան) Շաբաթ 21 նոյեմբեր 2015-ի երեկոյեան ժամը 5.00ին, Պէյրութի Սուրբ Գրիգոր Լուսաւորիչ  Սուրբ Եղիա Հայ Կաթողիկէ Աթոռանիստ եկեղեցւոյ մէջ, տեղի կ՝ունենայ Գերապատիւ Սարգիս Վրդ. Դաւիթեանի եւ Գերյարգելի Գէորգ Ծ. Վրդ. Ասատուրեանի եպիսկոպոսական ձեռնադրութիւնը  հանդիսապետութեամբ՝ Տանն Կիլիկիոյ Կաթողիկէ Հայոց Կաթողիկոս Պատրիարք`Ամենապատիւ եւ Գերերջանիկ Տէր Գրիգոր Պետրոս Ի.

Նորօծ երկու եպիսկոպոսները ապա կիրակի 22 նոյեմբերին իրենց անդրանիկ պատարագը պիտի մատուցանեն` Պուրճ Համմուտի Սուրբ Փրկիչ եկեղեցւոյ մէջ գերապայծառ Դաւիթեան եւ Սուրբ Գրիգոր Լուսաւորիչ  Սուրբ Եղիա Աթոռանիստ եկեղեցւոյ մէջ գերապածառ Ասատուրեան։

Հայր Սարգիս Դաւիթեան նշանակուած է Սպահանի՝ Իրանի Կաթողիկէ հայոց առաջնորդ։ Ան  ծնած է Հալէպ, 9 նոյեմբեր 1943-ին։Քահանայ ձեռնադրուած է 11 հոկտեմբեր 1970-ին։  Անոր եպիսկոպոսական անուանումը Ֆրանչսիկոս Պապին կողմէ վաւերացուեցաւ  1 հոկտեմբեր 2015-ին։

Գերյարգելի Գէորգ Վրդ. Ասատուրեանը ընտրուած է Պէյրութի Հայ Կաթողիկէ  Պատրիարքական Աթոռի օգնական եպիսկոպոս։ Ան  ծնած է 29 Ապրիլ 1961ին՝ Քամիշլի, Սուրիա: 1972ին մտած է Զմմառու Պատրիարքական դպրեվանք, ապա 1986 Հոկտեմբեր 3ին, ձեռնադրուած է քահանայ։

Գերյարգելի Գէորգ Վրդ Ասատուրեանի եպիսկոպոսի ընտրութեան հաւանութիւնը Ֆրանչսիկոս Պապին կողմէ հաստատուեցաւ 5 սեպտեմբեր 2015-ին։

Վատիկանի Ռատիոկայանի հայկական բաժնի անձնակազմը, իր սրտագին  բարեմաղթութիւններն ու շնորհաւորութիւնները կը փոխանցէ նորօծ եպիսկոպոսներուն ու յատկապէս Գերապածառ Աստուրեանին որ տարիներու ընթացքին եղած է նաեւ համագործակից Ռատիօ Վատիկանի հայկական բաժնին եւ պատասխանատու ''շաբաթական խորհրդածութիւններ'' հաղորդաշարին։