1998-2015 Հայաստանէն արտագաղթած է 366 հազար քաղաքացի

ՀՀ ազգային վիճակագրական ծառայութեան (ԱՎԾ) հրապարակումներու հիման վրայ՝ Aravot.am-ը կը ներկայացնէ Հայաստանի հանրապետութեան 2-րդ նախագահի եւ 3-րդ նախագահի ղեկավարման տարիներու արտագաղթի ցուցանիշերը։

«Ըստ ԱՎԾ-ի, 1998 թուականին Հայաստանէն մեկնողներու եւ Հայաստան ժամանողներու բացասական արդիւնքը, այսինքն՝ արտագաղթը, եղած է 24,400 մարդ։ 1999-ին, 7200 մարդ, 2000-ին, մեր երկրէն հեռացած եւ չէ վերադարձած 25,700 մարդ, ինչը 3 անգամով կը գերազանցէ 1999 թուականի ցուցանիշը։ 2001-ին, Հայաստանի հանրապետութենէն արտագաղթած է 25,000 մարդ, 2002 թուականին՝ 3000 մարդ։ 2003-ին, արտագաղթած է 7900 մարդ, 2004-ին, 8200 մարդ։ 2005-ին՝ 7700 մարդ, 2006-ին՝ մեր երկրէն հեռացած է՝ 22,000 մարդ։ 2007-ին՝ 3000 մարդ։ Քոչարեանի ղեկավարման 10 տարիներու ընթացքին, ըստ ԱՎԾ-ի, Հայաստանէն արտագաղթած է 134,100 մարդ։

«Նշենք, որ 2008 թուականին նախագահի ընտրութիւնները փետրուար ամիսին էին, Սերժ Սարգսեանը ստանձնած է Հայաստանի հանրապետութեան նախագահի պաշտօնը Ապրիլ 9-ին։

«2008 թուականին, դարձեալ ԱՎԾ-ի հրապարակած տուեալներու, Հայաստանէն գացած եւ չեն վերադարձած 23,100 մարդ։ Յաջորդ տարիներու արտագաղթի կշռոյթները աճած են մեծ արագութեամբ։ Ըստ վիճակագրական ծառայութեան հրապարակումներուն, Հայաստանի ուղեւորափոխադրումներու հաշուեկշիռը՝ ժամանումներու եւ մեկնումներու տարբերութիւնը 2009-ի Յունուար-Դեկտեմբերին կազմած է -25 հազար։ Այսինքն՝ 2009-ին Հայաստանէն մեկնած եւ չեն վերադարձած 25 հազար մարդ։ 2010-ի արտագաղթի ցուցանիշը՝ 29,900 եղած է, 2011-ին՝ 43,800, 2012-ին՝ 37,960։ 2013-ին Հայաստանէն 31,200 մարդ արտագաղթած է։ 2014-ին, մեր երկրէն արտագաղթած է 41,135 մարդ։

«Վերը նշուած թիւերը ամփոփելով, նշենք, որ 2008 թուականէն մինչեւ 2014 թուական Հայաստանի հանրապետութենէն արտագաղթած է 232 հազար 95 մարդ։

«Իսկ 2015 թուականի Յունուար-Սեպտեմբեր ամիսներուն, ինչպէս ներկայացուած է վիճակագրական ծառայութեան կայքին վրայ, Հայաստանէն մեկնած եւ տակաւին չէ վերադարձած 91,400 մարդ։ Այս թիւը չենք կրնար իբրեւ վերջնական արտագաղթի ցուցանիշ ներկայացնել, որովհետեւ տարին տակաւին չէ աւարտած, եւ կ՚ենթադրուի, որ 91,400 մեկնածներէն մէկ մասը պիտի վերադառնայ Հայաստան, հաշուի առնելով, որ մեկնողներու մեծ մասը, ինչպէս միշտ կը նշուի, արտասահման աշխատանքի մեկնածներն են։ Ուստի 2015 թուականի արտագաղթի, կամ մեկնած եւ չվերադարձածներու ցուցանիշը յստակ պիտի ըլլայ միայն տարին ամփոփելէ ետք։

«Այսպիսով՝ Ռոբերտ Քոչարեանի 10 տարիներու նախագահութեան օրոք պաշտօնական տուեալներով Հայաստանէն արտագաղթած է 134,000 մարդ, Սերժ Սարգսեանի նախագահութեան 7 տարիներուն արտագաղթած է 232,095 մարդ։ Ընդհանուր առմամբ՝ 17 տարիներու ընթացքին Հայաստանը լքած է 366,195 մարդ։