Անցեալ Կիրակի 1 Նոյեմբեր 2015-ին, առաւօտեան ժամը 10:30-ին, Զմմառու պատմական վանք
այցելեց Երեւանի Պետական համալսարանէն պատուիրակութիւն մը, գիտական աշխատանքի նպատակով:
Հայրենի պատմագէտներու խումբը կը գլխաւորէր՝ Երեւանի Պետական Համալսարանի Հայագիտական
Հետազօտութիւններու հիմնարկի փոխ տնօրէն՝ Պրն. Մհեր Յովհաննիսեան, որ հայագիտութեան համացանցային
ծիրի խնդիրներուն մասնագէտ է: Պատուոյ հիւրերը առաջին հերթին ներկայ գտնուեցան կիրակնօրեայ
աստուածային պաշտամունքին՝ վանքիս մայր տաճարին մէջ: Որմէ ետք՝ պատուոյ հիւրերը դպրեվանքի
դահլիճը ուղղուեցան, ուր դպրեվանքի փոխ տեսուչ՝ Հ. Մաշտոց Վրդ. Զահթէրեանը, յանուն Միաբանութեան,
բարի գալուստ մաղթեց հիւրերուն և սրտի անհուն գոհունակութիւնը յայտնեց այս այցելութեան
համար, յատկապէս այն պատճառով որ Երեւանի Պետական Համալսարանը սփիւռքահայ կառոյցներուն
կողքին կը կանգնէր: Այնուհետեւ հիւրերը այցելեցին վանքիս զանազան բաժանմունքները ինչպէս՝
Թանգարան, Մատենադարան, Հնատիպ Գիրքերու բաժին, Ձեռագրատուն և Գինեմառան, ապա նաեւ նորակառոյց
«Աբրահամ Արծիւեան» ժողովասրահը:
Կէսօրին՝ մեծայարգ հիւրերը դպրեվանքի սեղանատան մէջ մասնակցեցան եղբայրական ագապին, Վարչական
Խորհուրդի անդամներուն և դպրեվանքի ուսանողներուն հետ միասին, ուր Պրն. Մհեր Յովհաննիսեան
իր բաժակաճառին մէջ անդրադարձաւ Զմմառու վանքի հոգեւոր և կրթական կեանքին, շնորհակալութիւն
յայտնեց այս սիրալիր ընդունելութեան համար և հուսկ գնահատեց և քաջալերեց Զմմառու վանքին
մէջ կատարուած հոգեւոր և մշակութային աշխատանքները:
All the contents on this site are copyrighted ©. |