Ֆրանչիսկոս Պապ ինքնագիր նամակով հաստատեց ''Gravissimum educationis'' հիմնադրամը։

(Ռատիօ Վատիկան) Չորեքշաբթի 28 հոկտեմբեր 2015-ին Ֆրանչիսկոս Սրբազան Քահանայապետը ինքնագիր նամակով մը վաւերացուց  Կաթողիկէ Դաստիարակութեան Ժողովի` Վատիկանի Պետութեան ներքոյ ''Gravissimum educationis'' հիմնադրամի հիմնադրութիւնը, որուն նպատակն է հետապնդել ''գիտական եւ մշակութային նպատակներ որոնք նպաստեն աշխարհի մէջ տարածելու կաթողիկէ դաստիարակութիւնը''։

''Եկեղեցին կը ճանչնայ դաստիարակութեան կարեւորութիւնը մարդու կեանքէն ներս ինչպէս նաեւ անոր միշտ աւելի մեծ ազդեցութիւնը ժամանակակից ընկերային զարգացումի բերումով'' գրեց Սրբազան Հայրը ու ապա հաստատեց թէ ըստ եկեղեցական կանոնագիրքի 116, 117 եւ 1303 յօդուածներուն իրեն տրուած իշխանութեան` Վատիկանի մէջ կը  հիմնէ  ''Gravissimum educationis'' հիմնադրամը որ պիտի կառավարուի Եկեղեցւոյ կանոնական օրէնքներու եւ Վատիկան Պետութեան օրէնսդրութեան հիման վրայ։

Յայտնենք թէ այս տարի կը նշուի Վատիկանեան Տիեզերական Բ Ժողովի` Կաթողիկէ Դաստիարակութեան հայող ''Gravissimum educationis'' յայտարարութեան յիսուն  ամեակը։