Փրակի «Սուրբ Հոգի» Եկեղեցին փոխանցուած է Հայ համայնքին
Հոկտեմբեր 11-ին Փրակի «Սուրբ Հոգի» Կաթողիկէ եկեղեցին փոխանցուած է Հայ առաքելական եկեղեցւոյ Սուրբ Գրիգոր Լուսաւորիչ ծխական համայնքին` անժամկէտ օգտագործման համար: Այս մասին կը հաղորդէ Չեխիոյ մէջ գործող «Օրեր» ամսագիրը։
Պատմական այս իրադարձութեան ներկայ եղած է Չեխիոյ կաթողիկէ եկեղեցւոյ առաջնորդ，կարդինալ Տոմինիք Տուքան, որուն շնորհիւ իրականութիւն դարձած է չեխահայերուն ցանկութիւնը:
14-րդ դարուն կառուցուած «Սուրբ Հոգի» եկեղեցւոյ փոխանցման արարողութիւնը սկսած է ժամերգութեամբ，գոհաբանական աղօթքով:
ՀՀ դեսպան Տիգրան Սէյրանեան շնորհակալութիւն յայտնած է չեխ ժողովուրդին եւ կարդինալ Տուքային՝ փոխանցելով ՀՀ կառավարութեան շնորհաւորանքները:
Ներկաներուն իբրեւ օրուան յիշատակ բաժնուած են փայտէ խաչեր:
Արարողութեան ներկայ եղած են Չեխիոյ հոգեւոր դասի ներկայացուցիչներ，խորհրդարանի պատգամաւոր Մարեգ Պենտան，հայ համայնքի բազմաթիւ ներկայացուցիչներ: Եկեղեցի գտնուող հայերը ուրախութեամբ շնորհաւորած են զիրար եւ մոմավառութեամբ աղօթած:
| All the contents on this site are copyrighted ©. |