Сінод прывітаў рашэнне Папы аб “сужэнскім працэсе”

Удзельнікі Сінода Біскупаў падтрымалі ўвядзенне папам Францішкам новых нормаў, пакліканых паспрыяць паскарэнню прызнання несапраўднасці сужэнства. Адпаведныя дакументы Святога Айца былі апублікаваны два месяцы таму і ўвойдуць у сілу 8 снежня 2015 г., з пачаткам Юбілейнага Году Міласэрнасці. 

Згодна са словамі дэкана Трыбуналу Рымскай Роты, кс. Піа Віта Пінта, Сінадальныя Айцы прывіталі новаўвядзенні як “ясны закон, пакліканы адказаць на тэрміновыя патрэбы вернікаў і які, паводле чаканняў Папы, прынясе надзею” многім людзям і пазбавіць іх страху. 

Кіраўнік дыкастэрыі адзначыў, што дакументы Пантыфіка аб паскарэнні “сужэнскага працэсу” з’яўляюцца “плёнам сінадальнага шляху і сапраўдным выразам біскупскай калегіяльнасці”. Ён нагадаў, што іх прыняццю спадарожнічала шырокая дыскусія, яшчэ напярэдадні двух апошніх сесій Сінода. Аб неабходнасці паскарэння працэсу прызнання несапраўднасці сужэнства гаворка ішла і ў анкетах, разасланых ва ўсе епіскапаты свету. Гэта ідэя знайшла выраз таксама ў працоўным дакуменце Сінода Біскупаў “Instrumentum Laboris”, падкрэсліў кс. Пінта.

Адно з галоўных новаўвядзенняў тычыцца надання мясцовым біскупам поўні судовай улады, у тым ліку ў пытаннях аб прызнанні несапраўднасці сужэнства. “Такім чынам, папа Францішак жадае большай блізкасці касцёльных структур да вернікаў”, - сказаў дэкан Трыбуналу Рымскай Роты. Ён нагадаў таксама, што згодна з новымі законамі, кожны біскуп мае магчымасць правядзення працэсу ў кароткі тэрмін, калі несапраўднасць сужэнства пацвярджаецца відавочнымі фактамі.