Кардынал Герхард Людвіг Мюлер перасцерагае перад сродкамі масавай інфармацыі, якія навязваюць грамадскай думцы ідэалогію гендэр. Па словах прэфекта Кангрэгацыі Вервучэння сёння можна казаць пра медыя-таталітарызм. У адносінах да грамадства СМІ паводзяць сябе па-дыктатарску. Ідэалогія, якую яны навязваюць, прыводзіць да поўнай дэградацыі чалавека, мае цяжкія наступствы для дзяцей, моладзі і сужэнстваў.
У гэтым кантэксце Касцёл павінен абараняць годнасць чалавека, якая мае сваю аснову ў Богу Створцы, Які дае нам сваю ласку і ўсё неабходнае для дасягнення натуральнага і звышнатуральнага шчасця, у постаці вечнага жыцця, сказаў кардынал Мюлер. На яго думку, асабліва важным тут будзе Сінод Біскупаў, які пачынаецца ў Ватыкане 4 кастрычніка 2015 г.
“Святы Айцец заўсёды падкрэсліваў важнасць сям’і і сужэнства, якія з’яўляюцца асноўнай ячэйкай грамадства і Касцёла”, - нагадаў нямецкі кардынал. Ён выказаў надзею, што Сінод зойме ясную пазіцыю адносна сакрамэнтальнасці і святасці сужэнства. Бо сужэнства – гэта не проста чалавечы ідэал, а дар Божы. “Не можна практыкаваць тэалогіі, якая з’яўляецца каталіцкай, не прымаючы да ўвагі ўсе дагматы Касцёла аб сакрамэнце сужэнства. Не можна релятывізаваць сужэнства як таямніцы”, - падкрэсліў прэфект Кангрэгацыі Веравучэння і выказаў спадзяванне, “што дыскусіі на Сінодзе не стануць павярхоўнымі, а будуць грунтавацца на глыбокім разуменні вучэння Езуса, Старога і Новага Запаветаў, а таксама аўтэнтычнай інтэрпрэтацыі Аб’яўлення праз вучэнне Касцёла. Гэта, паводле кардынала, асноўныя ўмовы плённасці сінадальнай дыскусіі. Цяперашні Сінод вельмі важны для будучыні не толькі сям’і, але і Касцёла, лічыць прэфект Кангрэгацыі Веравучэння.
All the contents on this site are copyrighted ©. |