Папата во Белата куќа: Јас сум дете на мигрантско семејство

„Добредојдовте во Белата куќа, Свети Оче! Вашите пораки на љубов, надеж и мир нѐ исполнија сите нас“. Со овие зборови американскиот претседател Барак Обама го поздрави преку својот Твитер профил, папата Фрањо, само неколку минути пред официјалната церемонија на дочек во Белата куќа.

Папата Фрањо во Белата куќа беше пречекан од претседателот на САД, Барак Обама и неговата сопруга Мишел. На церемонијата учествуваа околу 20 илјади гости, меѓу кои претставници на епископската конференција на Америка и епископите на Вашингтон. Во своето обраќање Папата потсети на причините за неговата апостолска посета на САД и се задржа на теми како што се верската слобода, изградба на праведно општество, заштита на животната средина и заздравувањето на прекинатите врски, кои ги опиша како позитивни чекори кон патот на помирувањето, правдата и слободата.

******

Добар ден!

Г-дин Претседателе,

Благодарен сум за поздравните зборови, кои ги упативте кон мене од името на сите Американци. Како син на емигрантско семејства, среќен сум да бидам гостин на оваа нација која во најголем дел беше изградена од слични семејства. Со нетрпение ги очекувам овие денови на средби и дијалог во кои се надевам дека ќе слушнам и споделам многу од соништата и надежите на американскиот народ.

При оваа посета, ќе ја имам честа да се обратам на Конгресот, каде се надевам како брат на оваа Земја, ќе упатам охрабрувачки зборови кон оние кои се повикани да ја водат политичката иднина на нацијата со верност кон нејзините фундаментални принципи. Освен тоа, ќе ја посетам и Филаделфија, каде се одржува 8. Светска средба на семејствата, чија цел е да ги означи и поддржи институциите на бракот и семејството, во еден критичен момент од историјата на нашата цивилизација.

Г-дин Претседателе, заедно со своите сограѓани, американските католици се ангажирани во изградбата на едно општество кое треба да е навистина толерантно и инклузивно, во заштитата на правата на луѓето и заедниците и во отфрлањето на секоја форма на неправедна дискриминација. Заедно со бројните други луѓе со добра волја од оваа голема демократија, тие ги очекуваат напорите за градење на едно праведно и мудро уредено општество кое ќе ги почитува нивните најдлабоки грижи како и нивните права поврзани со верската слобода. Таа слобода е едно од најпознатите непроценливи достигнувања на Америка. Како што нѐ потсетија моите соработници епископи од Соединетите Американски Држави, сите се повикани кон внимателност, токму во својство на добри граѓани, за да ја чуваат и штитат оваа слобода од сè што може да ја загрози или компромитира.

Г-дин Претседателе, ги сметам за ветувачки предлозите по Ваша иницијатива за намалување на загадувањето на воздухот. Со оглед на итната потреба е јасно дека климатските промени се проблем кој не може да биде оставен на идната генерација. Историјата нѐ става во еден клучен момент за грижата за нашиот „заеднички дом“. Сѐ уште сме навреме, за да се справиме со овие промени и да се обезбеди одржлив и сеопфатен развој, затоа што знаеме дека работите можат да се променат“ (Laudato Si, 13). Овие промени бараат од наша страна сериозно и одговорно признание за каков свет сакаме да оставиме не само на нашите деца, туку, исто така, и на милионите луѓе кои живеат во еден систем кој ги игнорира. Нашиот заеднички дом е дел од групата на отфрлените, кои викаат кон небесата и кои денес чукаат со сила на вратите од нашите домови, градови и општества. Потсетувајќи на мудрите зборови на Мартин Лутер Кинг, можеме да кажеме дека сме заостанати со некои обврски и сега е време да ги исполниме.

Од верата знаеме дека Создателот не нѐ напушта и дека никогаш не отстапува од својата промисла на љубов и не жали што нѐ создал. „Човештвото има уште способност да соработува во изградба на нашиот заеднички дом“(Laudato si, 13). Како христијани, инспирирани од ова, сигурно, се стремиме да се ангажираме во свесна и одговорна грижа за нашиот заеднички дом.

Напорите кои неодамна беа направени за заздравувањето на прекинати односи и отворање на нови врати на соработка во рамките на нашето човечко семејство претставуваат позитивни чекори кон патот на помирувањето, правдата и слободата. Би сакал сите мажи и жени со добра волја од оваа голема и просперитетна нација да ги поддржат напорите на меѓународната заедница за заштита на најслабите во нашиот свет и да промовираат сеопфатни и инклузивни модели на развој, па нашите браќа и сестри, насекаде во светот, да можат да ги препознаат благодетите на мирот и просперитетот, кои Бог ги посакува за сите свои чеда.

Г-дин Претседателе, уште еднаш Ви благодарам за вашето добредојде и со нетрпение ги очекувам деновите во Вашата земја! Нека Господ Бог ја благослови Америка!

РВ/В.Н.