Fillon nesër, udhëtimi 10-të apostolik i Papa Françeskut në Kubë e në SHBA-së.
Rritet pritja në dy Vendet për ardhjen e Atit të Shenjtë Bergoglio. Një atmosferë
e veçantë ndjehet në Filadelfia, ku Papa do të takohet me pjesëmarrësit e Takimit
VIII Botëror të Familjeve. Gëzimi e shpresa karakterizojnë këtë shtegtim ndërkombëtar
të Papës. Mbi perspektivat e këtij udhëtimi papnor në dy Shtetet, Kubë e SHBA-së që
kanë nisur një proces të rëndësishëm të afrimit pas 50 vjetësh të prishjes së marrëdhënieve
diplomatike e të embargos së ashpër ndaj Havanës, foli Sekretari i Shtetit të Vatikanit,
kardinali Pietro Parolin, gjatë një intervistë për Qendrën Televizive të Vatikanit.
“Po, dihet fare mirë qëndrimi i Selisë së Shenjtë mbi këtë temë të embargos, që është
qëndrim i kundërt, përej atyre që mund të jenë arsyet, ekziston një e dhënë që vjen
nga realiteti, e kjo do të thotë se embargoja, ky lloj ndëshkimi, shkakton vështirësi,
vuajtje në popullsinë që e pëson. E pikërisht nga ky këndvështrim Selia e Shenjtë
e trajton çështjen, e në nivelin e Kombeve të Bashkuara, në asambletë e përgjithshme,
ka mbështetur mocionet që kërkojnë heqjen, eliminimin e embargos ndaj Kubës. E prandaj
shpresojmë, siç thonë ipeshkvijtë, urohet, dëshirohet të arrihet marrja e një mase
të kësaj natyre, do të thotë një liberalizim nga detyrimet e kufizimet, sidomos në
fushën ekonomike, për të sjell një hapje edhe më të madhe nga pikëpamja e lirisë dhe
të drejtave njerëzore, një lulëzim i këtyre aspekteve themelore për jetën e njerëzve
e të popujve”.
Një etapë e rëndësishme e udhëtimit të Papës në Kubë do të jetë vizita në Shenjtëroren
e Zojës së Bekuar ‘Virgen de la Caridad de Cobre..
Më duket krejt normale që Papa të vizitojë një shenjtërore mariane e një shenjtërore
mariane kubane siç është ajo e Caridad de Cobre, sepse devocioni ndaj Zojës së Bekuar
është një nga tiparet themelore të religjiozitetit e të fesë katolike që ka populli
i Amerikës Latine e pastaj sepse Virgen de La Caridad de Cobre e ka shoqëruar gjithmonë
historinë e kubanëve, në të gjitha momentet e saj, në gëzim e në dhimbje, në vuajtje
e në përparime, prandaj është si një simbol i historisë së saj, simbol i vetë popullsisë,
këndej Papa, duke shkuar në shenjtërore do të takojë një farë mënyre zemrën e këtij
ishulli e të këtij populli.
Në vijim, Sekretari i Shtetit të Vatikanit, kardinali Parolin, në intervistën e tij
,shquan disa tema kryesore të udhëtimit të Papa Françesku në Kubë e në SHBA-së, nga
19 deri më 28 shtator: nga përmirësimi i marrëdhënieve ndërmjet Kubës e SHBA-së, tek
kriza e emigracionit, kanonizimi i atë Juniperi Serra, njëri prej etërve themelues
të Amerikës, e deri te Takimi VIII Botëror i Familjeve që do të mbahet në Filadelfia.
SHBA-së, shpjegon kardinali Parolin, “ Papa besoj se prek pika të rëndësishme, pika
themelore e edhe kritike siç është ambienti, emigracioni etj., SHBA-së kanë një histori
të gjatë në pritje të emigrantëve”.
E mbi sistemin ekonomik kapitalist, mbi mbrojtjen e ambientit kritikuar në enciklikën
e Papës “Lëvduar qofsh” kard. Parolin thotë: “Gjërat nuk janë duke shkuar në drejtimin
e drejtë, ekziston nevoja e ndryshimit të stilit të jetës sonë për të qenë rojtarë
të krijimit siç thotë papa e jo përkundrazi sundues apo sulmues të krijimit”.
All the contents on this site are copyrighted ©. |