Երեւանի Մաշտոցեան Մատենադարանի աշխատակազմը Զմմառու վանքին մէջ

Չորեքշաբթի 9 Սեպտեմբեր 2015-ին, Զմմառու վանքին մէջ իր աւարտին հասաւ Մաշտոցեան Պետական Մատենադարանի աշխատակազմին՝ չցուցակագրուած ձեռագիրներու նկարագրութեան եւ ձեռագրացուցակի պատրաստութեան աշխատանքներուն երկրորդ հանգրուանը: Զմմառու վանքի մշակութային հարստութիւնը արժեւորող այս աշխատանքները տեւեցին երեք շաբաթ: Առ այս՝ աշխատակազմը անհրաժեշտ աշխատանք տարաւ ձեռագիրներու խնամքին առնչութեամբ: Մաշտոցեան Մատենադարանի գլխաւոր աւանդապահ և Ձեռագրագիտութեան եւ Մայր ցուցակի բաժնի վարիչ՝ Պրն. Գէորգ Տէր Վարդանեան և աշխատակազմի չորս անդամներ՝ Օրդ.ներ Տաթեւիկ Մանուկեան, Քնար Յարութիւնեան, Յասմիկ Իրիցեան և Նոննա Սարգսեան այս տարի եւս նկարագրեցին 250 նոր ձեռագիրներ BzNc - BzNr հաւաքածոյէն: 
Տեղին է յիշեցնել թէ 2013-ին՝ Զմմառու վանքին մէջ նոյն աշխատակազմը նկարագրած էր BzNc և BzNr հաւաքածոյէն 250 ձեռագիրներ, որոնց բնագիրները ձեռքի տակ չունենալով՝ անոնց վերաբերեալ մնացած հարցական կէտերը այս այցի ընթացքին ճշգրտեցին: Այսպէսով՝ աշխատակազմը Զմմառու չնկարագրուած 1100 ձեռագիրներէն 500-ը նկարագրած կ'ըլլայ: Ըստ Պրն. Գէորգ Տէր Վարդանեանի՝ Զմմառու վանքի ձեռագրաց ցուցակի երրորդ հատորը կը ծրագրուի հրատարակել գալ տարուայ երկրորդ կէսին: Զմմառու Պատրիարքական Միաբանութիւնը իր անհուն շնորհակալութիւնը կը յայտնէ Մաշտոցեան Պետական Մատենադարանի աշխատակազմին՝ ցարդ կատարած մեծ նպաստին համար և ի խորոց սրտի կը մաղթէ որ անոնց ժրաջան և բարի աշխատանքին շնորհիւ ի մօտոյ իրականանայ Զմմառու վանքի ձեռագրաց ցուցակի երրորդ հատորի հրատարակութեան ծրագիրը: