Вікарый Святога Айца для Дзяржавы Ватыкан кардынал Анджэла Камастры распавёў, што ватыканскімі парафіямі хутчэй за ўсё будуць прыняты дзве пяцідзетныя сям’і. Ім будзе забяспечана пражыванне, праца для бацькаў і медыцынскае абслугоўванне. Гэта будуць людзі, якія ўцякаючы ад вайны, перабраліся праз Міжземнае мора на поўдзень Італіі, на востраў Лампедуза. Зараз гэтыя сем’і шукаюцца з дапамогай каталіцкай дабрачыннай арганізацыі “Сaritas”.
Францішак жадае, каб яны жылі побач з Ватыканам, нібыта прыбываючы ў “ценю бацькоўскай любові Папы”. Пантыфік таксама пажадаў, каб іх медыцынскае забеспячэнне не клалася цяжарам на Італію. Бежанцы будуць карыстацца тымі самымі медыцынскімі паслугамі, што і ўсе ватыканскія служачыя, падкрэсліў кардынал Камастры. Пасля прыбыцця гэтых сем’яў у Рым, ватыканскія парафіі паклапоцяцца аб іх штодзённым быце.
Ватыканскі іерарх прызнаўся, што прыняцце дзвюх сем'яў бежанцаў, гэта “кропля ў акіяне праблем”. “Маці Тэрэза з Калькуты, аднак, казала, што акіян складаецца менавіта з такіх кропель, і кожная з іх вельмі важная. І гэта праўда. У нашым эгаістычным свеце мы павінны нібыта нанова вучыцца мастацтву чынення дабра”, - заўважыў кардынал.
All the contents on this site are copyrighted ©. |