«Ռոյթըրզ» կը հաղորդէ, որ Հիւսիսային եւ Հարաւային Քորէաներուն միջեւ լարուածութիւնը նուազած է երկու օր տեւած բանակցութիւններէ ետք:
Կողմերը հրապարակած են միացեալ յայտարարութիւն մը, որուն մէջ Փիոնկեանկ ափսոսանք յայտնած է վիրաւորուած հարաւային քորէացի զինուորներուն վերաբերեալ, որոնք ականի պայթումէն վնասուած էին ապառազմականացուած գօտիին մէջ: Սէուլն ալ իր կարգին համաձայնած է անջատել բարձրախօսները, որոնց միջոցով Հիւսիսային Քորէայի վարչակարգին դէմ քարոզչութիւն կը կատարէր վերջինիս հետ սահմանին վրայ:
Հիւսիսային Քորէա չեղեալ յայտարարած է զինուորական դրութիւնը, որ յայտարարուած էր կողմերուն միջեւ փոխադարձ ռմբակոծումներէն ետք: Բացի ատկէ, յայտարարութեան մէջ կը նշուի, որ երկու Քորէաները մայրաքաղաքներէն մէկուն մէջ հետագային պիտի կատարեն բանակցութիւններ, որոնց նպատակը պիտի ըլլայ կապերու բարելաւումը:
Միացեալ Նահանգներու արտաքին գործոց նախարարութիւնը ողջունեց համաձայնութիւն:
All the contents on this site are copyrighted ©. |