''Խօսք՝ Նոր Կաթողիկոս Պատրիարքի ընտրութեան առթիւ'' Հայր Գէորգ Զապարեան։

25  Յուլիս  2015-ին,  լուսաբնակ  Ներսէս  Պետրոս  19րդ  Կաթողիկոս  Պատրիարքի վախճանումէն  ամիս  մը  ետք,  հայ  կաթողիկէ  Եպիսկոպոսներուն  Սիւնհոդոսը  ընտրեց  անոր յաջորդը`  յանձին  Ֆրանսայի  Կաթողիկէ  Հայոց  վաստակաւոր  Առաջնորդին՝  Արհի.  Գրիգոր Եպիսկոպոս Ղապրոյեանի, որ Գրիգոր Պետրոս 20րդ անունը առաւ:

Ի  դէպ,  ամէն  հայ  կաթողիկէ  Կաթողիկոս  Պատրիարք  իր  ընտրած  անունին  կը  կցէ Պետրոս  անունը  իբրեւ  նշան  իր  յարումին՝  Ս.  Պետրոս  Առաքելապետին  եւ  անոր յաջորդներուն՝  Սրբազան  Քահանայապետներուն:  Ունեցած  ենք  Գրիգոր  Պետրոս  15րդ Աղաճանեան, այժմ ունինք Գրիգոր Պետրոս 20րդ Ղապրոյեան:

Ընտրութեան  արդիւնքին  հետաքրքրութեամբ  եւ  անհամբերութեամբ  սպասեցինք, քանի  պիտի  ընտրուէր  մեր  հայ  կաթողիկէ  Եկեղեցւոյ  Առաջնորդը,  զոր  եկեղեցական  կանոնագիրքը  կը  կոչէ  «Պետ  եւ  Հայր»  ողջ  համայնքին:  Ան  կը  կոչուի  նաեւ  Հովիւ  կամ Հովուապետ, ի նմանութիւն Բարի Հովիւին՝ Յիսուսի Քրիստոսի:

Սուրբ  Գիրքը  մեզի  կը  ներկայացնէ  Բարի  Հովիւը  յանձին  մեր  Տիրոջ  Յիսուսի Քրիստոսի,  որ  իր  կեանքը  զոհեց  իր  ոչխարներուն  համար,  օրինակ  հանդիսանալով,  դարերու ընթացքին,  բոլոր  այն  հովիւներուն  եւ  առաջնորդներուն,  որոնք  պիտի  ընդունին քահանայական  սուրբ  կարգը՝  ծառայելու  համար  Աստուծոյ  ժողովուրդին:  Հետեւաբար, եկեղեցական  իշխանութիւնը,  նախ  եւ  առաջ,  ծառայութիւն  է  եւ  ոչ  թէ՝  տիրապետութիւն, զոհողութիւն է եւ ոչ թէ՝ փառատենչութիւն:

Առաջնորդներուն  տրուած  իշխանութեան  նպատակն  է՝  առաջին,  ուսուցանել աստուածային  վարդապետութիւնը  հաւատացեալներուն,  որպէսզի  ասոնք  հասնին ճշմարտութեան  գիտութեան,  երկրորդ՝  որպէսզի  հաւատացեալները  զօրանան  ու  սրբանան սուրբ  խորհուրդներով  եւ  երրորդ՝  որպէսզի  իրենց  հետեւորդները  առաջնորդուին  դէպի յաւիտենական  կեանք:  Ասոր  համար,  Ս.  Պօղոս  կը  յորդորէ  քրիստոնեաները  անսալու  իրենց առաջնորդներուն տուած ուղղութիւններուն եւ հնազանդելու անոնց տուած ցուցմունքներուն:

Քրիստոսահիմ  Եկեղեցին  կը  հետապնդէ  իր  հիմնադիրին  նպատակը՝  Աւետարանին լոյսը  սփռելու  աշխարհի  մէջ  եւ  հաւատացեալներուն  օգնելու,  որպէսզի  ասոնք  ապրին  իրենց կեանքը սրբութեամբ եւ Աստուածպաշտութեամբ:

Կասկած  չկայ,  որ  Առաջնորդներն  ունին  իրենց  սխալներն  ու  սայթաքումները,  իրենց թերութիւններն  ու  տկարութիւնները,  քանի  ամէն  մահկանացու  մարդու  պէս՝  սխալական  են. սակայն,  կը  մնան  այն  անձերը,  որոնք  օծուած  են  Սուրբ  Հոգւոյ  կնիքով  եւ  յատուկ առաքելութիւն  մը  ունին  յորդորելու,  խրատելու,  ցուցմունքներ  կատարելու՝  ի  խնդիր  իրենց հոգեւոր խնամքին յանձնուած հաւատացեալներուն հոգւոյ փրկութեան:

Դիւրին  առաքելութիւն  մը  չէ,  մանաւանդ  մեր  ժամանակներուն,  երբ  Եկեղեցին  թիրախ դարձած  է  հակաեկեղեցական,  հակաքրիստոնէական  եւ  անաստուած  ընկերութեան արձակած  թունաւոր  նետերուն:  Արդարեւ,  ցաւով  կը  նկատենք  շատերուն  անտարբերութիւնը Եկեղեցւոյ  ուսուցումներուն,  Աւետարանական  վարդապետութեան  եւ  մանաւանդ  սուրբ Խորհուրդներուն  նկատմամբ.  անտարբերութիւն  մը՝  զոր  կը  պատճառէ,  մասամբ  մը,  կղերին յարուցած գայթակղութիւնները:

Ահա  թէ  ինչո'ւ,  այսօր  աւելի  քան  երբեք,  հաւատացեալները  կարիք  ունին  իմաստուն, լուսամիտ,  խոհեմ  եւ  մանաւանդ  սուրբ  առաջնորդներու՝  անշեղ  ընթանալու  համար  այս մոլորեցուցիչ ընկերութեան բաւիղներուն մէջէն:

Ուստի,  յատուկէն  աղօթենք  Ամենապատիւ  եւ  Գերերջանիկ  Տէր,  Տէր  Գրիգոր  Պետրոս Ի.  նորընտիր  Կաթողիկոս  Պատրիարքին  համար,  որպէսզի  կարենայ  Սուրբ  Հոգւոյ շնորհքներով,  ինք  նախ  սրբանայ  եւ  ապա՝  մեզ  սրբացնէ:  Նոյն  աղօթքը  բարձրացնենք  առ Աստուած  բոլոր  Առաջնորդներուն  համար,  Սրբազան  Քահանայապետէն  սկսեալ  մինչեւ ամենպարզ  քահանան,  որպէսզի  անձնազոհողութեամբ,  արիութեամբ  եւ  մանաւանդ պատասխանատուութեան հոգիով առաջնորդեն իրենց խնամքին յանձնուած հօտը:

«Շնորհեսցես մեզ ընդ երկայն աւուրս ուղիղ վարդապետութեամբ:»

Հ. Գ. Զ.