Երիտասարդաց Ազգային Օր - Զմմառու մէջ

Շաբաթ և Կիրակի 1-2 Օգոստոս 2015-ին, կէսօրէ ետք, Լիբանանի Կաթողիկէ համայնքներէն շուրջ 700 երիտասարդ-երիտասարդուհիներ, նախաձեռնութեամբ Լիբանանի «Աշխարհականներու Առաքելութեանց Խորհուրդին», «Երիտասարդաց Ազգային Օր» (Journée National de la Jeunesse – JNJ) անունով՝ երկօրեայ հաւաքոյթ կազմակերպեցին Զմմառու վանքին մօտակայ դաշտին մէջ: Սոյն խորհուրդին նախագահն է Մարոնի եպիսկոպոս Արհի. Ժորժ Ապու Ժաուտէ: Հաւաքին ներկայ գտնուեցան նաեւ շատ մը վարդապետներ և մայրապետներ: 
Իրենց մասնակցութիւնը բերին նաեւ Պէյրութի Թեմի Հայ կաթողիկէ Երիտասարդաց խորհուրդը, Ս. Մեսրոպի Արիները, Ս. Գրիգոր Լուսաւորչի Սկաուտները, ՀԿՄ Պատանեկանը, և ՀԿՄ Զալքայի Շեփորախումբը, առաջնորդութեամբ խորհուրդի հոգեւոր վարիչ՝ Հ. Ղազար Վրդ. Պետրոսեանին: 
Շաբաթ ժամը 3:00-ին երիտասարդ-երիտասարդուհիները հերթաբար այցելեցին Զմմառու վանքի եկեղեցին, թանգարանն ու գինեմառանը: 
Շաբաթ երեկոյեան ժամը 8:30-ին Զմմառու մայրավանքի ներքին մատակարար՝ Գեր. Հ. Եղիա Վրդ. Դերձակեան, Մեծ Եղեռնի 100-ամեակի առթիւ՝ երիտասարդ-երիտասարդուհիներուն դասախօսութիւն մը տուաւ գլխաւոր նիւթ ունենալով Հայոց Ցեղասպանութիւնը:
Երիտասարդաց Օրուան ընթացքին, Շաբաթ երեկոյեան՝ մեծ համերգ տեղի ունեցաւ դաշտի բեմահարդակին վրայ, որուն իրենց գործօն մասնակցութիւնը բերին հայ երիտասարդները, երգերով և խմբային տոհմիկ պարերով, իսկ Շեփորախումբը իր խանդավառ և ուրախ նուագներով տօնական մթնոլորտ ստեղծեց: Այս անմոռանալի օրը շարունակուեցաւ մինչեւ ուշ գիշեր և իր աւարտին հասաւ Ս. Հաղորդութեան Երկրպագութեամբ, որուն ընթացքին կատարուեցան սաղմոսներ և աղօթքներ բարեպաշտական մթնոլորտի մը մէջ:
Կիրակի առաւօտեան ժամը 11:00-ին, բացօթեայ ձայնաւոր Ս. Պատարագ մատուցեցին դաշտին վրայ Մարոնի ծէսով, նախագահութեամբ Արհի. Ժորժ Ապու Եպս. Ժաուտէի, համապատագեցին Պատրիարքական Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վ. Մուրատեան, Թրիփօլիի Մարոնի Առաջնորդը և շատ մը վարդապետներ: Պատարագի երգեցողութիւնը կատարեցին Ղազիրի նորընծաները: Ապա հաւաքական ճաշկերոյթէն ետք՝ օրուան հանդիսութիւնը վերջ գտաւ յետմիջօրեան ժամը 4:00-ին ուրախ և զուարթ մթնոլորտի մէջ: Ներկաները փոխադարձ բարեմաղթութիւներ կատարեցին, խոստանալով վերստին տեսնուիլ: