Një fëmijë palestinez 18-muajsh vdiq natën e kaluar nga flakët që i vënë shtëpinë
së tij kolonët izraelitë në Bregun Perëndimor, në afërsi të Nablus-it, në Cisjordani.
Familjarët e fëmijës janë shtruar në spitale në gjendje kritike.
Në njërin prej mureve të shtëpisë së sulmuar janë gjetur disa shkrime në hebraisht,
si fjalët “hakmarrje”, “Rroftë Mesia” e një yll i madh i Davidit. Kryeministri izraelit
Benjamin Netanyahu e dënoi ashpër këtë episod të tmerrshëm e foli për “akt terroristik”,
ndërsa presidenti i Autoritetit kombëtar palestinez Abu Mazen tha se përgjegjësinë
e ka qeveria izraelite e për këtë do t’i drejtohet Gjykatës penale ndërkombëtare kundër
Izraelit.
“Ky është një akt terrorist, në çdo aspekt të tij dhe shteti i Izraelit ka qëndrim
të ashpër e të palëkundur ndaj terrorizmit, pavarësisht se cilët janë autorët e tij”,
tha Netanyahu.
Për Autoritetin Kombëtar Palestinez, Izraeli është drejtpërdrejt përgjegjës për politikën
e vet mbi ngulimet dhe ndërtimet në zonë, prandaj për Abu Mazen ekzistojnë fakte për
denoncimin e Izraelit në Gjykatën e Hagës për “krime lufte”. Ndërkaq, Hamas i ka ftuar
të gjithë banorët e Nablus-it të dalin në shesh për të protestuar pas lutjes së premtes,
ndërsa një auto e kolonëve është goditur me armë zjarri në afërsi të Ramallah-ut.
Ngjarja tragjike dhe dënimi prerë i Nethanyaut nxjerrin në pah rolin e kolonëve në
politikën izraelite.
Por, deklaratat e Netanyahut nuk kanë mjaftuar t’i bindin palestinezët se akti çnjerëzor
është thjesht një nismë individuale e një grushti kolonësh hebrenj. Për Organizatën
për çlirimin e Palestinës, qeveria izraelite mban “përgjegjësi të plotë për vrasjen
brutale të fëmijës, Ali Saad Daëabsha”.
Vrasja e foshnjës vjen në një kohë përshkallëzimi të tensioneve në rajon.
Kujtojmë se të mërkurën e kaluar, grupe kolonësh u përleshën me policinë pasi autoritetet
izraelite shkatërruan dy godina në ndërtim për të cilat Gjykata e Lartë kishte dalë
në përfundimin se janë ngritur ilegalisht në tokë me pronarë palestinezë. Vdekja e
fëmijës mes flakëve që plagosën prindërit dhe vëllain e tij 4-vjeçar Ahmad, ngjason
shumë me akte të mëparshme vandalizmi nga ekstremistët hebrenj, pjesë e një “strategjie”
që vjen si formë hakmarrjeje ndaj aksioneve kundër ndërtimeve të paligjshme në Bregun
Perëndimor.
All the contents on this site are copyrighted ©. |