Ծերակոյտին մէջ Քուպայի հետ յարաբերութիւններու կանոնաւորումի առաջին քայլ։
«Ռոյթըրզ» կը հաղորդէ, որ Միացեալ Նահանգներու Ծերակոյտի մէկ յանձնախումբը վաւերացուցած է օրէնքի փոփոխութիւնները, որոնց համաձայն, կը վերցուին ամերիկացի քաղաքացիներուն համար Քուպա այցելելու շարք մը սահմանափակումներ:
Պիւտճէական յատկացումներու կոմիտէն թեր քուէարկած է սահմանադրութեան մէջ փոփոխութիւններ կատարելու քայլին` վերջնականապէս վերցնելով Քուպա այցելելու սահմանափակումը Միացեալ Նահանգներու քաղաքացիներուն համար, ինչպէս նաեւ երկու երկիրներուն միջեւ առեւտրական գործարքներու սահմանափակումը:
Կը հաղորդուի, որ փոփոխութիւնները ուժի մէջ կը մտնեն Ծերակոյտի լիագումար նիստին ընթացքին հաստատուելէ ետք:
Յիշեցնենք, որ ապրիլին Միացեալ Նահանգներու նախագահ Պարաք Օպամա եւ Քուպայի նախագահ Ռաուլ Քասթրօ 50 տարուան մէջ առաջին անգամ ըլլալով բանակցութիւններ վարած են: 20 յուլիսին Միացեալ Նահանգներու մէջ վերաբացուած է Քուպայի դեսպանութիւնը:
| All the contents on this site are copyrighted ©. |