2015-07-23 09:26:00

Աղօթքի երեկոյ երջանկայիշատակ Ներսէս Պետրոս ԺԹ կաթողիկոս Պատրիարքի յիշատակին։


(Ռատիօ Վատիկան) Շաբաթ` 25 յուլիս 2015-ի երեկոյեան ժամը 6-էն 7, Սրբոյ Կուսին Աւետման եկեղեցւոյ մէջ, կազմակերպուած է աղօթքի երեկոյ եւ սուրբ հաղորդութեան երկրպագութեան արարողութիւն, ի յիշատակ երջանկայիշատակ Ներսէս Պետրոս ԺԹ Տանն Կիլիկիոյ Կաթողիկէ Հայոց կաթողիկոս - պատրիարքին ու անոր հոգւոյն հանգստեան։

Աղօթքի երեկոն տեղի կ՛ունենայ Երջանկայիշատակ Հոգեւոր Տիրոջ մահուան առաջին ամսուայ առթիւ որ պատահած էր անցեալ 25 յունիս 2015-ին, սրտի կաթուածի հետեւանքով։

Ներսէս Պետրոս ԺԹ ծնած էր Գահիրէ, 17 Յունուար 1940-ին։ Քահանայ ձեռնադրուած էր Գահիրէ, 15 Օգոստոս 1965-ին, ձեռամբ թեմին Առաջնորդ՝ Ռափայէլ Եպս. Պայեանի։  18 Փետրուար 1990-ին, Աղեքսանդրիոյ Հայ Կաթողիկէ Թեմին Առաջնորդ օծուած է ձեռամբ Ամեն. Յովհաննէս Պետրոս ԺԸ. Կաթողիկոս Պատրիաքին։

1999-ի հոկտեմբեր 7-ին՝ Հայ Կաթողիկէ Եպիսկոպոսաց Սիւնհոդոսին կողմէ ընտրուած է Կաթողիկոս Պատրիարք Տանն Կիլիկիոյ Կաթողիկէ Հայոց եւ առած է Ներսէս Պետրոս ԺԹ. անունը։ Գահակալութեան արարողութիւնը տեղի ունեցած է նոյն ամսուան 24-ին։ Իսկ 13 Դեկտեմբեր 1999-ին՝ Եկեղեցական Հաղորդութիւն ստացած է Յովհաննէս Պօղոս Բ. Սրբազան Քահանայապետին կողմէ։

16 տարուայ պատրիարքութեան շրջանին ողբացեալ Պատրիարքին իրագործած ձեռնարկներէն ներս, արժանի է նշել` Անոր ձեռք բերած պատմական վերջին ձեռնարկը այն է`Ֆրանչիսկոս Քահանայապետին, 2015-ի ապրիլի 12-ին, Հայոց ցեղասպանութեան 100-րդ տարելիցին առթիւ մատուցած սուրբ Պատարագը Վատիկանի «Սուրբ Պետրոս» պազիլիքային մէջ ու այդ առթիւ սուրբ Գրիգոր Նարեկացիին Տիեզերական Եկեղեցւոյ Վարդապետի հռչակումը:

Յիշատակն արդարոց օրհնութեամբ եղիցի








All the contents on this site are copyrighted ©.