Святы Пасад станоўча ацаніў пагадненне па Ірану

Святы Пасад задаволены пагадненнем па іранскай ядзернай праграме. Заключаная ў Вене дамова паміж ЗША, Вялікабрытаніяй, Францыяй, Расіяй, Кітаем, Германіяй і Іранам сцвярджае, што на працягу 15 гадоў апошняя з узгаданых краін не будзе ўзбагачаць уран ў прамысловых маштабах, а ўвесь да гэтага часу выпрацаваны і сабраны матэрыял будзе заставацца пад кантролем. Узамен здымаецца эмбарга на продаж зброі ў Іран і вызваляецца каля 160 млрд. долараў іранскіх актываў, замарожаных у выніку заходніх санкцый.

У адказ на пытанні журналістаў, кіраўнік Залы Друку Апостальскай Сталіцы, кс. Фэдэрыка Ламбардзі, апублікаваў 14 ліпеня 2015 г. наступную заяву: “Пагадненне па іранскай ядзернай праграме было станоўча ацэнена Святым Пасадам. Гэта важны вынік перамоў, якія вяліся да гэтага часу, але існуе патрэба ў пастаянных намаганнях і прыхільнасці ўсіх, каб пагадненне магло прынесці свае плёны. Трэба спадзявацца, што гэтыя плёны не абмяжуюцца толькі сферай ядзернай праграмы, але распаўсюдзяцца на іншыя вобласці”.