Երիտասարդներու հետ հանդիպումով վերջ կը գնտէ Պապին առաքելական 9-րդ ճամբորդութիւնը։

(Ռատիօ Վատիկան) Կիրակի 12  յուլիս 2015-ի երեկոյեան. Փարակուէյի Ասունսիոն քաղաքի ''Քոսթաներա''-ի` 5 քմ երկարութիւն ունեցող գետափի տարածքին, տեղական ժամով 17-ին (Հռոմի ժամով 23-ին) երիտասարդներուն հետ ունեցած հանդիպումով,  Ֆրանչիսկոս Պապը կ՛եզրափակէ Էքուատոր, Պոլիվիա եւ Փարակուէյ կատարած առաքելական միջազգային 9-րդ ճամբորդութիւնը։

Նորին Սրբութեան վերջին օրուան օրակարգը սկիզբ առաւ առաւօտեան 8-ին (Հռոմի ժամով 14-ին) Ֆրանչիսկոս Պապին ''Իլ Պանիատօ Նորթէ'' աղքատ  շրջանին տուած այցելութեամբ, որմէ ետք Սրբազան Հայրը  փոխադրուեցաւ Նիու Կուազու-ի սրբավայրը ուր, բազմահազար հաւատացեալներու ներկայութեամբ, նախագահեց Սուրբ պատարագի արարողութեն որուն աւարտին նոյն վայրէն արտասանեց Մարեմեան աղօթքը։ Մինչ Կէսօրին Ասունսիոնի առաքելական նուիրակութեան մէջ  հանդիպում ունեցաւ Փարակուէյի եպիսկոպոսներուն հետ` անոնց հետ բաժնեկցելով նաեւ սիրոյ սեղանը։

Յետմիջօրէի ժամը 16,15-ին (Հռոմի ժամով 22,15-ին) Ֆրանչիսկոս Պապը հրաժեշտ կ՛առնէ Ասունսիոնի առաքելական նուիրակութենէն եւ կ՛ուղղուի ''Քոսթաներա''` ուր նախատեսուած է առաքելական ճամբորդութեան եզրափակիչ հանդիպումը, այնտեղ համախմբուած հազարաւոր երիտասարդներուն հետ։

Հանդիպումի աւարտին Ֆրանչիսկոս Պապը եւ իրեն ընկերացող շքախումբը  կ՛ուղղուին Ասունսիոնի միջազգային օդակայան։ 

Ճանապարհին վրայ, Նորին Սրբութիւնը պահ մը կանգ կ՛առնէ ''Իքու Պոլանիոս'' առեւտուրի կեդրոնի մօտ, օրհնելու համար զայն, ու ապա կը շարունակէ իր երթը դէպի օդակայան ուր ժամը 18,45-ին (հռոմի ժամով երկուշաբթի 13 յուլիսի 00,45-ին) տեղի կ՛ունենայ հրաժեշտի պաշտօնական արարողութիւնը եւ ժամը 19-ին (հռոմի ժամով 13 յուլիսի առաւօտեան 1-ին) Ֆրանչիսկոս Սրբազան Քահանայապետին սաւառնակը թռիչք կ՛առնէ դէպի Իտալիա` ուր վայրէջքը նախատեսուած է  12 ժամ 45 վայրկեան տեւող թռիչքէ ետք, երկուշաբթի 13,45-ին (Հռոմի ժամով),  Հռոմի Չամփինօ օդակայան։