Պապին՝ Պոլիվիայի այցելութիւնը կ՝եզրափակուի եպիսկոպոսներուն հետ հանդիպումով։

(Ռատիօ Վատիկան) Ֆրանչիսկոս Սրբազան Քահանայապետին, Պոլիվիա կատարած առաքելական այցելութեան երկրորդ օրուան յայտագիրը սկիզբ կ՛առնէ, ուրբաթ 9 յուլիսին,  առաւօտեան 7.30-ին (Հռոմի ժամով 13,30-ին), Նորին Սրբութաեն, Սանթա Քրուզի վաստակաւոր Արքեպիսկոպոսի նստավայրի մատրան մէջ մատուցած  առանձնական Սուրբ Պատարագով։

Ապա՝ Սրբազան Հայրը կ՛ուղղուի Սանթա Քրուզի ''Փալմասոլա'' անուամբ բանտ, այցելութիւն տալու բանտարկեալներուն։

Բանտին մէջ Ֆրանչիսկոս Պապը կը դիմաւորուի բանտի ընդհանուր տնօրէնի եւ բանտի մատրանապետ` գերապայծառ Խէզուս Ժուարէզի կողմէ։ Որմէ ետք՝ բանտի մարզադաշտին մէջ կը հանդիպի բանտարկեալներուն։

Բանտին տուած այցելութենէն ետք Նորին Սրբութիւնը, ժամը 11.00ին (հռոմի ժամով 17-ին) ինքնաշարժով կը փոխադրուի ''Լա Սանթա Քրուզի'' անուամբ ժողովրդապետութեան եկեղեցի,  ուր՝ հանդիպում կ՝ունենայ Պոլիվիայի  եպիսկոպոսաց դասին հետ­  որմէ  անմիջապէս ետք կը փոխադրուի Սանթա Քրուզի ''Վիրու Վիրու'' կոչուող միջազգային օդակայան ու հրաժեշտ կ՛առնէ Պոլիվիայէն ուղղուելու համար  դէպի առաքելական ճամբորդութեան երրորդ եւ վերջին հանգրուան Փարակուէյ։