(Ռատիօ Վատիկան) Յորդանանի մէջ ապաստան գտնող Սուրիացի գաղթականներուն ի նպաստ, ՄԱԿ-ը նուազեցուցած է նիւթական օժանդակութիւնը, անօթութեան մատնելով աւելի քան 450,000 անձեր, եւ բացասական հետեւանքներ ստեղծելով Յորդանանեան թագաւորութեան քաղաքական կայունութեան։
Սոյն ահազանգը հնչեցուցած է Յորդանանի Գարիթասի ընդհանուր տնօրէն տիար Վայէլ Սուլէյման զրոյց ունենալով Ֆիտէս լրատուական գործակալութեան հետ 3 յուլիս 2015-ին։.
Սուլէյման հաղորդած է, թէ ՄԱԿ-ի սննդեղէնի բաժանմունքը շաբաթ մը առաջ ազդարարած է, թէ դրամական ֆոնտի պակասութեան պատճառաւ ՄԱԿ- ի դրամական հիմնարկը պիտի նուազեցնէ սննդեղենի բաշխման օժանդակութիւնը։
Նշենք, թէ ներկայիս Յորդանանին մէջ կը գտնուին մէկ միլիոն չորս հարիւր հազար Սուրիացի գաղթականներ, որոնցմէ՝ միայն 650 հազարը արձանագրուած են ՄԱԿ- գրասենեակի ցուցակներուն մէջ։
Յորդանանի գարիթասի ընդհանուր տնօրէնը , ՄԱԿ-ի նիւթալան օժանդակութեան նուազեցումը վերագրած է միջազգային ընտանիքի որդեգրած քաղաքականութեան՝ միջին արեւելքի երկիրներու նկատմամբ, աւեցնելով թէ ակնյայտ է , որ միայն խաղաղութեան հսկայ յառաջընթացքով կարելի է փորձել դուրս գալ սոյն տաժանելի կացութենէն բայց՝ յստակ է , թէ կան մարդիկ որոնք շահախնդիր են միջին արեւելքի մէջ խանգարումներ ստեղծել։ Գարիթասի տնօրէնը մեղադրելով աշխարհի մեծ իշխանութիւնները ընդգծած է թէ դրամի պակասութեան պատճառաւ կարելի չէ կերակուր ապահովել գաղթականներուն սակայն՝ զէնք շինելու , ծախելու եւ գնելու համար կարելի է միշտ դրամ հայթայթել։
All the contents on this site are copyrighted ©. |