Францішак правёў экуменічную сустрэчу

“У гэты час цяжкіх выпрабаванняў і пакут нам трэба яшчэ больш умацаваць повязі сяброўства і братэрства паміж Каталіцкім Касцёлам і Сірыйскай Праваслаўнай Царквой”, - сказаў Францішак, звяртаючыся 19 чэрвеня 2015 г. у Ватыкане да Ігнацыя Эфрэма II, Патрыярха Антыёхіі і ўсяго Усходу, кіраўніка вышэйузгаданай супольнасці. Святы Айцец падкрэсліў, што пачатак дыялогу абедзвух Цэркваў датуецца 1971 г., калі Павел VI сустрэўся з Патрыярхам Ігнацыем Якубам III. Затым былі спатканні Яна Паўла II з папярэднікам цяперашняга Прадстаяцеля Патрыярхам Ігнацыем Заккай I Івасам (у 1984 г. у Ватыкане і ў 2001 г. у Дамаску).

Францішак нагадаў, што Сіра-якабіцкая Царква з’яўляецца супольнасцю мучанікаў. Так было ў першыя стагоддзі хрысціянства, і так адбываецца і сёння у выніку войнаў і пераследу. Ён адзначыў, што ў абліччы вялікіх пакут і шматлікіх нявінных ахвяр, здаецца, што моцныя гэтага свету не могуць знайсці рашэння. Пантыфік заклікаў свайго госця да супольнай малітвы за ахвяр насілля і ўсіх войнаў у свеце. Ён запрасіў паскорыць сумесныя крокі на агульным шляху “да адзінай Царквы Хрыстовай, пры адным алтары ахвяры і праслаўлення”. “Трэба здзейсніць абмен скарбамі нашых традыцый як духоўных дароў, таму што тое, што нас аб’ядноўвае, значна большае за тое, што падзяляе”, - сказаў Святы Айцец.

Сірыйская Праваслаўная Царква адна з шасці старажытнаўсходніх Цэркваў, якія прызнаюць тры Сусветных Саборы. Яны называюцца таксама “нехалкідонскімі”, таму што па розных прычынах ня прынялі рашэнні Халкідонскага сабора ў 451г. На ім, сярод іншага, монафізіцтва было асуджана як ерась. Сірыйская Царква налічвае каля 3,5 млн вернікаў па ўсім свеце. Патрыярх Ігнацый Эфрэм II кіруе ёй 31 сакавіка 2014 г.