Патрыярх: абарона прыроды – экуменічны прает

Барацьба са зменамі клімату не можа ажыццяўляцца індывідуальна ўстановамі або нацыямі, лічыць Патрыярх Канстантынопальскі Барталамей I. “Праблема патрабуе ўвагі і дзеянняў усяго чалавецтва – асабліва багатых рэгіёнаў нашай планеты”, - заявіў ганаровы кіраўнік праваслаўя ў інтэрв’ю нямецкаму штотыднёвіку “Die Zeit”. Патрыярх высока ацаніў энцыкліку папы Францішка “Laudato si”, прысвечаную абароне навакольнага асяроддзя.

“У размове з нашым дарагім братам папам Францішкам мы пагадзіліся, як важна, што Цэрквы Усходу і Захаду разам працуюць над гэтым пытаннем”, - сказаў Барталамей I. “Мы павінны ўзварухнуць нашых людзей і змяніць або, як кажа энцыкліка, паўплываць на наша экалагічнае навяртанне”, - сказаў Патрыярх. Ён падкрэсліў: “Наша ганарыстасць і наш ізаляцыянізм аддаліў нас ад Бога і прыроды. Толькі пакора і згода могуць вылечыць нашу параненую планету”.

75-гадовы Барталамей I, ганаровы кіраўнік больш за 300 мільёнаў праваслаўных вернікаў, вядомы сваёй прыхільнасцю да абароны навакольнага асяроддзя, таму яго часта называюць “зялёным патрыярхам”.