Папа і прэм’ер-міністр Польшчы размаўлялі аб Украіне

12 чэрвеня 2015 г. папа Францішак прыняў на аўдыенцыі прэм’ер-міністра Польшчы Эву Копач, якая затым сустрэлася з арцыбіскупам Полам Галахерам, сакратаром Святога Пасаду па адносінах з дзяржавамі.

У ходзе сардэчных перамоў было высока ацэнена спакойнае і эфектыўнае супрацоўніцтва ў падрыхтоўцы візіту, які Святы Айцец здзейсніць у Польшчу ў 2016 годзе, з нагоды Сусветных дзён моладзі. Падчас аўдыенцыі абмяркоўваўся станоўчы ўклад Каталіцкага Касцёла ў Польшчы ў актуальны сацыяльна-эканамічны кантэкст і некаторыя пытанні этычнага характару. 

Удзельнікі сустрэчы абмяняліся поглядамі на міжнародную сітуацыю, з асаблівай увагай на становішча ва Украіне, гаворыцца ў спецыяльным паведамленні Залы Друку Апостальскай Сталіцы.

У якасці падарунку Эва Копач перадала Францішку саджанец польскай яблыні, якая – паводле слоў прэм’ера, – будзе даваць цудоўнейшыя яблыкі, а таксама  сярэбранае блюда ўпрыгожанае бурштынам, на якое гэтыя яблыкі можна будзе пакласці. Ад Пантыфіка яна атрымала медальён з выявай св. Марціна, які накрывае плашчам бедных, як знак, што нагадвае аб адказнасці дзяржаўных кіраўнікоў за клопат аб патрабуючых. Cустрэча працягвалася каля 30 хвілін.