Ֆրանչիսկոս Սրբազան Քահանայապետին գործունէութիւնը։

(Ռատիօ Վատիկան) Երկուշաբթի` 8 յունիս 2015-ի առաւօտեան Ֆրանչիսկոս Սրբազան Քահանայապետը նախագահեց Քահանայապետի անմիջական խորհրդատու` Ինը կարդինալներու խորհուրդի 10-րդ նիստը։ Յայտնենք որ այս խորհուրդը, ստեղծուած է նոյնինքն Ֆրանչիսկոս Քահանայապետին կամքով եւ պարտականութիւնն ունի օգնել Քահանայապետին` եկեղեցին կառավարելու առաքելութեան մէջ եւ քննարկել Հռոմի Քուրիայի ու Եկեղեցւոյ կառավարութեան բարեփոխումները։

Կարդինալական այս խորհուրդը իր առաջին նիստը գումարած էր 1-3 հոկտեմբեր 2013, վերջընթեր նիստը տեղի ունեցած էր անցեալ 13 -15 ապրիլ 2015։ Յայտնենք թէ Կարդինալական խորհուրդին սոյն նիստերը վերջ կը գտնեն վաղը` 9 յունիսի յետմիջօրէին, իսկ այսօր` 8 յունիսի առաւօտեան նիստերու աւարտին, Սրբազան Հայրը, Տոմուս Սանթա Մարթայի  մէջ ունկնդրութիւն կը շնորհէ  Փուերթօ Րիքոյի եպիսկոպոսաց համահաւաք դասի անդամներուն որոնք հռոմ ժամանած են իրենց հնգամեայ կանոնական այցելութիւնը կատարելու Սուրբ Պետրոսի յաջորդին։