Մայիս ամիսը նուիրուած սուրբ կոյսին։
Քրիստոնեայ աշխարհը կ՛ապրի Մայիս ամիսը` որ նուիրուած է Ս. Կուսին, տօնելով հանդերձ
Ս. Յովսէփը, որ յատուկ դեռ ունեցաւ փրկչագործութեան խորհուրդին մէջ: Աւետարանիչը զինք
կը ներկայացնէ որպէս Աստուծոյ մարդը, »արդար«, խոնարհ ու համեստ, քաջ ու վեհանձն: Ան
կը նուիրուի անվերապահ` մոռնալով ինքզինք: Ան կ՛ապրի ծածուկ կեանք մը: Կը ճանչնայ Ս.
Կոյսն ու Յիսուսը ու անոնց կ՛ընկերանայ իրենց ուրախ եւ տխուր առօրեային միշտ Հաւատարիմ:
Փեսայ մը սքանչելի պահապան` հակառակ կեանքի դժուարութիւններուն: Ապահով առաջնորդ` իւրաքանչիւրիս:
Պատուելու համար մարդկութեան գեղեցկագոյն Ծաղիկը, Ս. Կոյս` Մարիամը, իր Մայիս ամսոյն
մէջ:
Ս. Յովսէփ Ս. Կոյսը կը սիրէ, անոր մէջ` կը տեսնէ մեղքի խաւարին մէջ քալող ժողովուրդներուն խոստացուած Մեսիայի մայրը:
Ան կը հիանայ Մարիամի առաւելութիւններուն ու մտածելակերպին վրայ, աղօթքին ու ամփոփումին, ընկերային կեանքին ու գուրգուրալիր ծառայասիրութեան իր զաւկին նկատմամբ:
Այս օրհնեալ ամսուայ ընթացքին, Ս. Յովսէփի հետ, ջանանք խոնարհաբար դիմել Աստուածամօր` հաղորդակցիլ ապրիլ հետը, սերտօրէն սիրելու զինք ու մեծարել որպէս թագուհի քրիստոնեաներուն: Աշխատինք ըլլալ ճշմարիտ զաւակներ վստահիլ անոր մեր անգոյն ու անհամ ջուրերը, որպէսզի փոխէ զանոնք համեղ գինիներու եւ իր բարեխօսութեամբ սիրենք իր զաւակը ու դառնանք հարազատ եղբայրները:
Քրիստոնեաները ընտանիքներով միասին կ՛աղօթէին վարդարանը մասնաւորաբար շաբաթ օրերը` ընտանիքին բոլոր անդամներով, երբեմն ալ դրացիներով:
Աստուածամօր ջերմեռանդութիւնը կը սկսի Խաչին ստորոտը երբ Քրիստոս կ՛ըսէ իր մօր. »Ահա՛ Որդիդ«: Այդ օրէն այս ջերմեռանդութիւնը կ՛աճի ու կը զարգանայ:
Խոկանք Ս. Կոյսին կեանքին շուրջ: Խօսինք հետը եւ յատկապէս անոր բանանք մեր խոցելի ու խոցուած սրտերը, որպէսզի մեզ պահէ ամէն տեսակ հոգեւոր փոթորիկներէ:
| All the contents on this site are copyrighted ©. |