Համահայկական խաղերուն Հայաստան պիտի գան Հայ մարզիկներ 180 քաղաքներէ

Համահայկական խաղերուն իրենց մասնակցութիւնը պիտի բերեն 175-­180 քաղաքներու 5 հազար հայ մարզիկներ: Այս տարուան խաղերը եզակիներէն է մասնակիցներու մեծ թիւով եւ աշխարհագրութեամբ: «Արմէնփրես»-­ի փոխանցմամբ` այս մասին Համահայկական խաղերու համաշխարհային կոմիտէի նախագահ Իշխան Զաքարեանը յայտնած է Բիւրականի մէջ Հայոց ցեղասպանութեան 100-­րդ տարելիցի ձեռնարկներուն կամաւորներուն շնորհակալագիրներու յանձնման արարողութեան ժամանակ:

Ան կամաւոր երիտասարդներուն կոչ ուղղած է իրենց փորձով աջակից ըլլլալու նաեւ 1999 թուականէն չորս տարին մէկ Հայաստանի մէջ տեղի ունեցող Համահայկական խաղերուն ժամանակ: «Ընդհանրապէս մարզական միջոցառումների ժամանակ շատ ընդունուած ու յարգուած է կամաւորական աշխատանքը եւ ամենաշնորհակալ աշխատանքն է դա: Քանի որ մարդիկ, անկախ մասնագիտութիւնից, զբաղուունքից, ժամանակի շատ կամ քիչ լինելուց, իրենց օրուայ մի մասը տրամադրում են այդ աշխատանքներին: Հաշուի առնելով, որ այս անգամ մենք աննախադէպ թուով հիւրերի ենք սպասում Սփիւռքից, իսկ այդ հիւրերից 90­-95 տոկոսն առանջին անգամ է լինելու Հայաստանում, մենք նախատեսում ենք հինգ հարիւր կամ գուցէ աւելի կամաւորականների ընդգրկել այդ խաղերում»,-­ըսած է Իշխան Զաքարեանը:

Ան նշած է, որ կամաւորները պէտք է աշխատին հայ­-իրանական, հայ-­վրացական սահմանային անցակէտերուն, «Զուարթնոց» օդակայանին, Երեւանի, Վանաձորի, Գիւմրիի, Ստեփանակերտի մէջ: «Շուրջ երկու հարիւր կամաւորականներ մասնակցելու են Համահայկական խաղերի բացման արարողութեանը եւ հաշուի առնելով ձեր մեծ փորձը, յուսով ենք կը միանաք մեր թիմին (խումբին-ԵՌԳ.) ու կ’աշխատէք մեզ հետ»,-­ըսած է Իշխան Զաքարեանը:

Հայոց ցեղասպանութեան 100-­րդ տարելիցի ձեռնարկներուն կամաւորական աշխատանք կատարած է 451 երիտասարդ Հայաստանի տարբեր համալսարաններէն:

Համահայկական ամառնային 6-­րդ խաղերու ջահը Մայիս 8-­ին վառեցաւ Շուշիի մէջ եւ Արցախի ու Հայաստանի քաղաքներով պիտի ուղեւորուի Հայաստանի Հանրապետութեան մայրաքաղաք Երեւան: Ջահը պիտի անցնի հայաշատ շարք մը քաղաքներով: Համահայկական ամառնային 6­-րդ խաղերը տեղի պիտի ունենան Օգոստոս 2-­13: Խաղերու օրակարգին վրայ ընդգրկուած նախկին տասը մարզաձեւին` ֆութպոլ, մինիֆութպոլ, պասքեթպոլ, վոլէյպոլ, աթլեթիքա, թենիս, սեղանի թենիս, ճատրակ, պատմինթոն, լող, աւելցած են եւս եօթը` լողափնեայ վոլէյպոլ, մարզական պարեր, կոլֆ, հանտպոլ, բազկամարտ, հեծանիւ եւ հրաձգութիւն: