2015-05-20 09:34:00

Զահլէի Ֆաթիմայի Տիրամօր տօնակատարութիւն


Կիրակի 17 Մայիս 2015-ին, կէսօրէ ետք ժամը 4:30-ին, Զահլէի Ֆաթիմայի Տիրամօր Հայ կաթողիկէ եկեղեցիին մէջ Սուրբ և Անմահ պատարագ մատուցանեց և քարոզեց Պէյրութի Թեմի Պատրիարքական Ընդհանուր Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վրդ. Մուրատեան, որ յաւուր պատշաճի իր քարոզին մէջ շեշտեց Ս. Վարդարանի ամէնօրեայ աղօթքի անհրաժեշտութեան վրայ ըսելով թէ. «Եկեղեցին Դ. դարէն Ս. Կոյսը կը դաւանի Մայր Աստուծոյ, յաւիտենական Կոյս և քրիստոնէութեան հզօր բարեխօս: Ան իր կուսական մաքրութեամբ այնքան բարի է և լի շնորհքներով և առաքինութիւններով, որ երբ կ'աղօթենք Ս. վարդարանը ամէն օր, այդ բոլոր բարիքներէն մենք ալ կ'օգտուինք, երբ հաղորդութեան մէջ կը մտնենք Տիրամօր հետ»: Ս. Պատարագի աւարտին, քաղաքին մէջ թափօր կատարուեցաւ Տիրամօր արձանով Ս. Վարդարանի աղօթքով և Աստուածամօր նուիրուած շարականներու երգեցողութեամբ, մասնակցութեամբ եկեղեցական հայրերու, Զմմառու վանքի Վարչական Հայրերու, «Ս. Միքայէլ և Երանելի Մալոյեան» դպրեվանքի ուսանողներուն և բազմաթիւ հաւատացեալներու, որմէ ետք բոլորին ճոխ հիւրասիրութիւն մը տրուեցաւ Զահլէի Հայ Կաթողիկէ ժողովրդապետութենէն ներս:

 








All the contents on this site are copyrighted ©.