Kujtojmë sot, më 15 maj, përvjetorin e vdekjes së Monsinjor Nikollë Minit,
famullitarit të Kishës Katedrale së Prizrenit. Monsinjor Nikollë Mini lindi
më 9 korrik 1924, në Ferizaj. Ishte më i vogli ndër katër fëmijët, që Zoti u fali
prindërve, Kolë Mini dhe Monika Kajtazi.
Shumë shpejt mbeti jetim dhe iu desh të strehohej në dyert e të afërmve. Fëmijë i
mençur, jashtëzakonisht i shkathët, tërhoqi vëmendjen e meshtarëve vendas, që e përcollën
në seminarin e Prizrenit e pastaj në Seminarin e Shkodrës e të Zagrebit, ku kreu studimet
filozofike e teologjike.
U shugurua meshtar njëherësh me don Milorad Defarin, misionar kroat i mirënjohur ndërmjet
shqiptarëve me emrin dom Mila, në vitin 1950. Nisi menjëherë shërbimin meshtarak kudo
e kërkoi Kisha: nga Shenjtërorja e Zojës së Bekuar Crnagore në Letnicë, në fshatin
Novoselë e Bec të Gjakovës, në Zym e Velezhë të Prizrenit e pjesën e fundit të misionit
meshtarak e të veprimtarisë kulturore e atdhetare në bashkësinë katolike pranë Katedrales
së Prizrenit, ku edhe mbylli sytë më 15 maj 1992 në altar të Zotit, ndërsa kremtonte
Meshën Shenjte, duke vulosur kështu përkushtimin themelor ndaj Krishtit e Kishës së
Tij ndër shqiptarë, për të cilën jetoi e punoi tërë jetën.
Figurë poliedrike, Monsinjor Nikollë Mini u dallua si meshtar i zellshëm e atdhetar
i flakët, si ndërtues kishash e posaçërisht të Kishës së gjallë, Trupit Mistik të
Krishtit, si organizator i rinisë katolike, si mjeshtër i korit kishtar, si gojëtar-predikatar
i Ungjillit, si publicist, si autor i fletëpalosjes "Zani i Zojës së Crnagorës" dhe
i katekizmit me titull "Besimi katolik", themelues, bashkë me ipeshkvin imzot Nikë
Prela, të revistës fetare-kulturore "Drita" e cila më vonë pati edhe shtëpinë e vet
botuese prej nga dolën shumë botime me përmbajtje kulturore, fetare e shpirtërore.
Në përvjetorin e vdekjes e kujtojmë dom Nikollë Minin si njeri që jetoi për Zotin
e me Zotin, për popullin e me popullin; kultivues e përçues të vlerave ungjillore
e kombëtare, si meshtar që jetoi për altarin dhe mbylli sytë në altar të Zotit, duke
lënë kështu gjurmë të pashlyeshme në jetën e Kishës e të kulturës shqiptare, si model
që meriton të ndiqet nga breznitë e reja.
All the contents on this site are copyrighted ©. |