Папа паразмаўляе аб міры з італьянскімі школьнікамі

Папа Францішак будзе размаўляць з дзецьмі на тэму міру, любові, гасціннасці і адкрытасці. 11 мая 2015 г. Пантыфік прыме на аўдыенцыі ў ватыканскай Зале Паўла VI каля 7 тыс. маленькіх удзельнікаў італьянскай адукацыйнай ініцыятывы пад назвай “Фабрыка спакою”. Яе мэта заключаецца ў тым, каб пачынаючы ад самых пачатковых класаў школы вучыць дзяцей культуры міру.

Прэзентацыя ініцыятывы прайшла 5 мая 2015 г. у сядзібе Харчовай і сельскагаспадарчай арганізацыі Аб’яднаных Нацый (ФАО) у Рыме ў прысутнасці шматлікіх італьянскіх палітыкаў, прадстаўнікоў СМІ, касцёльных структур і грамадскай супольнасці. З ватыканскага боку прысутнічаў кіраўнік Залы Друку Апостальскай Сталіцы кс. Фэдэрыка Ламбардзі.

Святар адзначыў важнасць праекту і выказаў надзею, што ён зможа прыносіць плёны адначасова з ростам дзяцей. Езуіт нагадаў словы папы Францішка аб важнасці “адукацыйнага саюза” паміж сям’ёй, школай і грамадства, мэта якога павінна заключацца ў выхаванні кожнага дзіцяці, а таксама аб патрэбе ў “культуры сустрэчы” здольнай дапамагачы пераадоліць рознага кшталту падзелы на карысць супольнага дабра грамадства. Папа можа даць моцнае натхненне гэтаму праекту, выказаў перакананасць кс. Ламбардзі.