ֆրանչիսկոս Պապը ուղիղ եթերով կը մասնակցի Միլանի ''Expo 2015-ի'' բացումին։

(Ռատիօ Վատիկան) Յառաջիկայ ուրբաթ` մէկ Մայիս 2015-ին, ֆրանչիսկոս Քահանայապետը ուղեղ եթերի միջոցաւ իր միջամտութիւնը պիտի բերէ Միլանի  ''Expo 2015-ի'' բացման արարողութեան։  Նախաձեռնութիւն մը որ կարելի եղաւ իրագործել Իտալական ու Վատիկանեան  հեռուստատեսիլի կայաններու շնորհիւ։

Սրբազան Քահանայապետը  որոշումը  մասնակցելու Միլանոյի տիեզերական տօնավաճառի բացման արարողութեան կ՛ուզէ ընդգծել Եկեղեցւոյ յանձնառումը այս առթիւ շօշափուող նիւթին  շուրջ` '' Սնուցանել երկրագունդ։ Կեանքի ուժանիւթ'' կը տեղեկագրէ Միլանոյի թեմին հրապարակած մէկ  հաղորդագիրը։

Կաթողիկէ Եկեղեցին արդարեւ զանազան եղանակներով կը մասնակցի վերոյիշեալ ձեռնարկին։

Ս. Աթոռը պաշտօնապէս ներկայ է ''Էքսպօ 2015-ին'' որպէս ցուցադրող երկիր մը, իր իւրայատուկ տաղաւարով ''ոչ միայն հացով'' վերտառութեամբ, չորս մեծ գլուխներու ստորաբաժանուած` ''պահպանելիք պարտէզ մը'', ''բաժանելիք կերակուր'', ''դաստիարակող ճաշ մը'' եւ ''հաց մը որ ներկայ կը դարձնէ Աստուծոյ ներկայութիւնը աշխարհի մէջ''։

Միջազգային Քարտիթասը եւս ունի իր տաղաւարը, ունենալով որպէս պատգամ` ''կիսել բազմապատկելու համար։ Հացը բեկանել''։ Այդ տաղաւարով միջազգային Քարիթասը կ'ուզէ դրսեւորել սովի ողբերգութիւնը աշխարհի մէջ։

Ըլլայ Ս. Աթոռը, ըլլայ Միջազգային Քարիթասը ''Էքսպոյի'' վեց ամիսներուն ընթացքին մշակութային ընդարձակ յայտագիր մը ծրագրած է։

Նշենք որ Միլանի Ամպրոզեան թեմը, առաջնորդութեամբ կարդինալ Անճելօ Սքոլայի, որու թեմին մէջ տեղի կ'ունենայ ''Միլանի Էքսպօ 2015ը'', սկիզբէն խանդավառութեամբ ընդառաջեց այդ նախաձեռնութեան, նկատելով զայն բարեպատեհ առիթ մը Աւետարանի ճանաչումին ու անոր տարածումին։