Papa: çdonjëri prej nesh, edhe Shtetet kanë përgjegjësi ndaj fëmijëve “Të dashur
vëllezër e motra të mendojmë mirë: me fëmijë nuk luhet! Të mos i shkarkojmë fajet
tona mbi fëmijë, ju lutëm!”. Ky është qortimi që bëri sot Papa Françesku gjatë Audiencës
së Përgjithshme, në Vatikan, kushtuar vuajtjeve të fëmijëve.
"Të dashur vëllezër e motra, katekizmin mbi familjen e plotësojmë sot me reflektimin
për fëmijët, që janë fryti më i bukur i bekimit që Krijuesi i ka dhënë burrit e gruas.
Kemi folur për dhuratën e madhe që janë fëmijët, sot duhet të flasim mjerisht për
“histori plot vuajte” që jetojnë shumë prej tyre.
Shumë fëmijë qysh në fillim refuzohen, braktisën, atyre u vidhet fëmijëria dhe e ardhmja.
Ndokush ka guximin të thotë, gati gati për t’u justifikuar, se ka qenë një gabim pse
u është mundësuar të vijnë në botë. Kjo është turp! Mos t’i shkarkojmë fajet tona
mbi fëmijë! Fëmijët nuk janë kurrë “një gabim”, një “lëshim”. Uria e tyre nuk është
një gabim, ashtu siç nuk është varfëria e tyre, brishtësia e tyre, braktisja e tyre;
e nuk është as injoranca e tyre apo paaftësia e tyre. Përkundrazi, këto janë arsye
për t’i dashur më shumë, me një bujari më të madhe. Çka kemi bërë me deklaratat solemne
të të drejtave të njeriut e të fëmijës, nëse pastaj i ndëshkojmë fëmijët për gabimet
e fajet e të rriturve?
Ata që kanë detyrën e qeverisje, të edukimit, po do të thosha të gjithë të rriturit,
të gjithë jemi përgjegjës për fëmijët e duhet të bëjmë atë që mund të bëhet për ta
ndryshuar këtë situatë. Çdo fëmijë i mënjanuar, i braktisur, që jeton rrugëve duke
lypur lëmosh e me çdo mjet tjetër të mundshëm, pa shkollë, pa kurime mjekësore , është
britmë që lartohet tek Zoti dhe akuzë ndaj sistemit që e kemi ndërtuar. E mjerisht
këta fëmijë janë pre dhe viktima të kriminelëve, që i shfrytëzojnë për trafiqe e tregti
të padenja, apo i stërvisin për luftëra e për dhunë. Po edhe në Vende të pasura ka
shumë fëmijë që jetojnë drama që ndikojnë rëndë në jetën e tyre, për shkak të krizës
familjare, për shkak të mungesës së edukimit e të kushteve të jetës që nganjëherë
janë çnjerëzore. Sidoqoftë janë foshnjëri të cenuara në trup e në shpirt". Presin
ndihmën e mbrojtjen nga ne të rriturit.
All the contents on this site are copyrighted ©. |