Кардынал Курт Кох, старшыня Папскай рады спрыяння хрысціянскаму адзінству, выказаўся супраць “англіканізацыі” папскай улады. Неабходна шукаць новага спосабу яе здзяйснення, без змены яе сутнасці, адзначыў іерарх у інтэрв’ю нямецкай газеце “Tagespost”.
“Я б не хацеў англіканізацыі, таму што крыху ведаю пра пакуты архіепіскапа Кентэрберыйскага, які з’яўляецца толькі ганаровым прымасам – маючы вялікую адказнасць, валодае невялікай колькасцю кампетэнцый”, - сказаў кардынал Кох. Ён падкрэсліў, што ганаровая першаснасць добра функцыянуе “пры добрым надвор’і”, а ў выпадку праблемных сітуацый неабходна фактычная ўлада – права апошняга голасу і ясных кампетэнцый.
Кардынал Кох распавёў, што чым больш займаецца праблематыкай экуменізму, тым глыбей пераконваецца, што “папская ўлада гэта вялікі дар Пана для Яго Касцёла”. Калі б не папская ўлада, з Каталіцкім Касцёлам адбылося тое самае, што з Праваслаўнымі Цэрквамі: “ён бы ўяўляў сабой суму падзеленых нацыянальных Касцёлаў”.
На думку ватыканскага кардынала, актуальны пераслед хрысціян большы па сваім размаху за той, які адбываўся у першыя стагоддзі. “Экуменізм мучанікаў”, які яму спадарожнічае – з’яўляецца сапраўдным зернем еднасці Касцёла, але гэты аспект не дастаткова бярэцца пад ўвагу, лічыць пурпурат.
All the contents on this site are copyrighted ©. |