2015-03-20 12:06:00

Expo Milano 2015: “Jo vetëm me bukë”, tema e pavijonit të Vatikanit


E hapur për të gjithë ata që dëshirojnë ta vizitojnë nga 1 maji, deri më 31 tetor 2015, Expo Milano është  ekspozitë universale me natyrë jo tregtare, pra, jo panair, organizuar nga kombet, që kanë fituar garën e kandidaturës. Parashikon edhe pjesëmarrjen e kombeve të tjera të ftuara përmes kanaleve diplomatike të vendit mikpritës.

Ekspozita e parë universale ka qenë ajo Londrës, më 1851. Suksesi i saj i padiskutueshëm i nxiti edhe kombet e tjera të organizojnë nisma të së njëjtës natyrë, si ajo e Parisit, në vitin 1889, që kujtohet posaçërisht për Kullën Eifel (Tour Eiffel). Çdo Ekspozitë Universale i kushtohet një teme të caktuar, me interes universal.

Ekspozita Universale realizohet në një vend të pajisur për këtë qëllim. Është rast i përshtatshëm për t’u takuar e për të shkëmbyer përvojën ndërmjet pjesëmarrësve e vizitorëve, përmes njohjes inovative të temës. Roli i Ekspozitës Universale, më shumë se për të ekspozuar të rejat më në shenjë të teknologjisë, synon të shpjegojë sfidat kolektive, të cilave duhet t’u përgjigjet njerëzimi. Organizmi ndërkombëtar, që e drejton cilësinë dhe zhvillimin e ekspozitave, është Bureau International des Expositions (BIE), krijuar nga një konventë ndërkombëtare, nënshkruar në Paris, më 1928. Aktualisht në BIE bëjnë pjesë 160 shtete. 

Kujtojmë se Expo 2015 i kushtohet temës së sigurimit ushqimor për mbarë njerëzimin, me synim për t’i dhënë fund dramës së urisë.

Selia e Shenjtë do të jetë e pranishme zyrtarisht në këtë veprimtari të rëndësishme, si vend ekspozues, me pavijonin e saj. Në qendër të vëmendjes së pavijonit, përvoja e ushqimit, me të gjitha vlerat e veta, parë si zemër e jetës së krishterë, sepse çast i rritjes njerëzore e shpirtërore, i lidhjes e i solidarietit, i ndihmës e i kujdesit, i punës e i zhvillimit, shpjegojnë organizatorët e pranisë kishtare në Expo 2015. E tema e bukës së përditshme, që e kujtojmë në Atynë e që është simbol i ushqimit në përgjithësi, të nxit të reflektosh për edukimin fetar, drejtësinë, paqen, marrëdhëniet ndërmjet popujve, ekonominë, ekologjinë.

“Jo vetëm me bukë”, është prandaj, tema qëndrore. Pavijoni, bën të ditur përgjegjësi i komunikimit, don Davide Milani, është realizuar tashmë e do të drejtohet nga Konferenca ipeshkvnore italiane dhe Dioqeza e Milanos, në bashkëpunim me Këshillin Papnor të Kulturës. Kështu Kisha ambroziane, në territorin e së cilës zhvillohet Expo, do të ketë mundësi të tregojë nismat e veprimtaritë e saj më të rëndësishme, në përkim me temën e pavijonit. Një kopsht për t’u ruajtur; një gjellë për t’u ndarë së bashku; një sofër, që edukon; një bukë, që e bën të pranishëm Zotin në botë janë, thënë simbolikisht, “kapitujt”, përmes të cilëve organizohet pavijoni, i bazuar mbi disa shprehje të ndryshme artistike, që nga më tradicionalet, tek më të rejat. Për t’u njohur me hollësitë e pranisë së Selisë së Shenjtë në Expo e për të qenë gjithnjë të përditësuar, duke njohur të gjitha veprimtaritë e reflektimet lidhur me këtë ngjarje, janë aktivizuar kanale të veçanta komunikimi: faqja e internetit expoholysee.org dhe  profili Twitter @expoholysee. Shpjegon don Milani: Prani tjetër zyrtare e Kishës katolike në Ekspozitën universale, është ajo e Caritas Internationalis, organizëm që përfshin të gjitha Karitaset e botës e që do të jetë në Milano si “Civil Society Participant”. Hapësira ekspozuese do të jetë një qoshk i madh, që do të ketë në qendër një vepër të rëndësishme të artit bashkëkohor. Vizitës i prin mesazhi “Ndaj, për të shumëfishuar. Thyeje bukën”, që bën të njohur   fushatën botërore të Karitasit kundër dramës së urisë.

 








All the contents on this site are copyrighted ©.