Հոգեհանգիստ ի յիշատակ Գերյ. Հ. Յովհաննէս Ծ.Վրդ. Օրջանեանի

Քառասնորդաց Մեծ Պահոց շրջանի՝ «Դատաւորի» Կիրակին, 15 Մարտ 2015-ին, առաւօտեան ժամը 10:30-ին, Զմմառու վանքի մայր տաճարին մէջ Սուրբ և Անմահ Պատարագ մատուցանեց վանքիս Փոխ Մեծաւոր՝ Գերյ. Հ. Անդրանիկ Ծ.Վ. Կռանեան, ի հանգիստ հոգելոյս Հ. Յովհաննէս Ծ.Վ. Օրջանեանի, որուն վախճանման 5-րդ տարելիցն էր, ինչպէս նաեւ տիրամայր Մարի և Գէորգ Օրջանեաններու հոգիներուն համար: Հոգեհանգստեան պաշտօնը կատարուեցաւ «Յովհաննէս Վրդ. Օրջանեան Ներքնագաւիթ»ին մէջ, գլխաւորութեամբ պատարագիչ Հօր և ներկայութեամբ վանաբնակ Հայրերուն, Երան. Մալոյեան և Ս. Միքայէլ դպրեվանքերու սաներուն, ինչպէս նաեւ հոգելոյս Գերյարգելիին հարազատներուն և հաւատացեալ ժողովուրդին: Տեղին է յիշեցնել որ վանքի ներքնագաւիթը «Յովհաննէս Վրդ. Օրջանեան» անուանուած է, որովհետեւ լուսահոգի Գերյարգելին երկար տարիներ խնամած էր անոր ծաղիկներն ու վարդերը և գողտրիկ շրջաբակը փոքրիկ դրախտավայրի վերածած էր: Սրբազան արարողութենէն ետք, ներկաները ուղղուեցան վանքիս դահլիճը, ուր փոխադարձ բարեմաղթութիւններ կատարուեցան: Յիշատակ արդարոց օրհնութեամբ եղիցի: