Ֆրանչիսկոս Պապին հովուական այցը ''Սանթա Մարիա Տել Ռետենթորէ'' ժողովրդապետութեան։

(Ռատիօ Վատիկան) Կիրակի` 8 մարտ 2015 ի յետ միջօրէին, քառասնորդացի երրորդ կիրակին ըստ լատինաց, Ֆրանչիսկոս Պապը հովուական այցելութիւն կը կատարէ Հռոմի ''Թոր Պելլա Մոնաքա'' շրջանը գտնուող ''Santa Maria del Redentore'' անուան ժողովրդապետութեան։

Նորին Սրբութիւնը վատիկանէն կը մեկնի 15,15-ին եւ ''Santa Maria del Redentore'' ժողովրդապետութիւն կը ժամանէ 15,45-ին։ 'Վերոյիշեալ ժողովրդապետութիւնը կը գտնուի Հռոմի արուարձաններու ''Թորրէ Անճելա'' կոչուած շրջանին մէջ։ Ժողովրդապետութիւնը կառուցուած է 1 հոկտեմրե 1985-ին։ Ներկայիս եկեղեցւոյ ժողովրդապետն է Հայր Ֆրանչէսքօ Տէ Ֆրանքոն։

''Santa Maria del Redentore'' ժողովրդապետութիւն տանող ճամբուն վրայ Ֆրանչիսկոս Պապը կանգ կ՛առնէ ''Սրբուհի Ճովաննա Անթիտա'' եկեղեցւոյ մօտ ուր կը հանդիպի Քալքութայի Մայր Թերեզայի միաբանութեան քոյրերու խնամակալութեան յանձնուած խումբ մը աղքատներու եւ հիւանդներու հետ որմէ ետք կ՛ուղղուի հովուական այցելութեան վայր եւ ժողովրդապետութեան մարզադաշտին մէջ կը  հանդիպի առաջին հաղորդութեան խորհուրդի պատրաստուող մանուկներուն հետ ինչպէս նաեւ ժողովրդապետութեան դաստիարակչական կեդրոնը յաճախող մանուկներուն հետ։
Նորին Սրբութիւնը ապա կը փոխադրուի ժողովրդապետութեան թատերասրահը ուր կը հանդիպի  ժողովրդապետութեան հովուական խնամակալութեան խորհուրդներու անդամներուն հետ եւ ուր մի քանի հաւատացեալներուն կը մատակարարէ խոստովանանքի խորհուրդը, որուն աւարտին ժողովրդապետութեան   ''Santa Maria del Redentore'' եկեղեցւոյ մէջ կը գլխաւորէ հովուական այցելութիւնը եզրափակող Սուրբ Պատարագի արարողութիւնը։