Film i ri për Papën Piu XII: shpëtoi 800 mijë hebrenj

Në përvjetorin e lindjes (2 mars 1876) e të zgjedhjes në fronin e Shën Pjetrit (2 mars 1939) të Papës Piu XII, u paraqit në Romë, para se të dalë në sallat e gjithë botës, filmi “Shades of Truth” (Hije të vërtete), me regjizore Liana Marabini. Filmi do të projektohet në maj, në Festivalin e Kanës e në shtator, në Filadelfia, me rastin e Takimit Botëror të Familjeve. I realizuar me dëshmitë e panjohura të disa hebrenjve të shpëtuar nga Eugenio Pacelli, për të cilin vijon procesi i lumnimit, filmi synon të tregojë sa pa bazë është legjenda, sipas së cilës Papa Piu XII heshti përballë tragjedisë së Shoah. Protagonist është David Milano, një gazetar italo-amerikan me origjinë hebre, të cilit i besohet një artikull për Papën Pacelli, fryt i një hetimi të gjatë.  Është personazh, që ekziston vërtet, hebre njujorkez, që e urrente Piun XII, por pas studimit të dokumenteve ndryshoi aq shumë mendje, saqë themeloi një fondacion, i cili pjesërisht merret me punë kërkimore për Papën Pacelli. Pikërisht ai i vuri në dispozicion regjizores arkivin e vet shumë të pasur.

“Ka qenë Schindler-i i Vatikanit” deklaron regjizorja, duke kujtuar se Piu XII shpëtoi nga kthetrat e nazistëve mëse 800 mijë hebrenj. Shifra është e bazuar në dokumente historike, të cilat, me hapjen e Arkivave Sekrete të Vatikanit, mund t’i konsultojnë të gjithë. Natyrisht, thekson me ironi Liana Marabini, shumë pak prej kritikuesve të Papës Pacelli ka shkuar në Vatikan për t’i shqyrtuar.