Վատիկանեան տիեզերական Բ. ժողովի ծիսական նոր կանոններու հրատարակութեան 50.րդ տարեդարձին
առթիւ, ֆրանչիսկոս Քահանայապետի նախագահութեամբ Սուրբ Պատարագ։
(Ռատիօ Վատիկան) Շաբաթ 7 Մարտ 2015-ին, ֆրանչիսկոս Քահանայապետը Հռոմի
ամենայն Սրբոց եկեղեցւոյ մէջ պատարագ պիտի մատուցէ վերակոչելու Վատիկանեան Բ. Տիեզերական
ժողովի ծիսական նոր կանոններու հրատարակութեան 50.րդ տարեդարձը։ Ճիշտ 50 տարի առաջ երանելի
Պօղոս Զ Քահանայապետը վերոյիշեալ եկեղեցւոյ մէջ` 7 Մարտ 1965-ին, առաջին անգամուան համար
պատարագ մատուցեց իտալերէն լեզուով, փոխանակ լատիներէն լեզուի, հետեւելով Վատիկանեան
տիեզերական Բ. ժողովի ծիսական նոր կանոններուն։ Այդ առթիւ կատարած իր խորհրդածութեան
մէջ, երանելի Պօղոս Զ Քահանայապետը հետեւեալ ըսած էր ''ծիսական այս նոր կանոններով Եկեղեցին
մեզ կը հրաւիրէ նոր ձեւով աղօթել, պատարագ մատուցանել։ Սկիզբ կը տրուի,այսօր, ծիսակատարութեան
նոր ձեւին։ Ասիկա մեծ դէպք մըն է որ պէտք է յիշել որպէս սկզբունք հոգեւոր նոր կեանքին,
Աստուծոյ ու մարդու միջեւ մեծ երկխօսութեան նոր յանձնառում մը''։ Հիմնականապէս կանոնը
կը կայանայ աղօթել` հասկնալ իւրաքանչիւր նախադասութիւն եւ իւրաքանչիւր բառ, ու ամբողջացնել
մեր անհատական զգացումներով ու միաձեւել զանոնք հասարակութեան հոգիին հետ - ըսաւ ապա
երանելի Պօղոս Զ ու հարց տուաւ ''ի՞նչ է այս ծիսակատարութիւնը որ կը մատուցանենք'' ու
պատասխանեց` ''անիկա հանդիպում մըն է Աստուածային Զոհը մատուցողին, մասնակցող ժողովուրդին
հետ։ Նման հանդիպում մը հետեւաբար պէտք է ըլլայ ամբողջական ու սիրալիր։ Այս պատճառաւ
Պատարագիչը յաճախ ներկաներուն կ'ուղղէ ''Խաղաղութիւն ամենեցուն'' ողջոյնը։ Այս ողջոյնով
պատարագիչը նաեւ իր ողջոյնը կ'ուղղէ քաղաքի համայն քրիստոնեայ ժողովուրդին։