Մարոնի համայնքի Պշարա Ռայի պատրիարքը ուրբաթ, 20 փետրուարին, կէսօրէ ետք վերադարձաւ
Լիբանան: Պէյրութի միջազգային օդակայանին մէջ Ռայի պատրիարքը դիմաւորեց Մարոնի համայնքի
խորհուրդին նախագահ Ուատիհ Խազեն: Օդակայանին մէջ լրագրողներուն հետ ունեցած իր զրոյցին
ընթացքին Ռայի պատրիարքը շեշտեց, որ Վատիկանը ամէն ջանք ի գործ կը դնէ Լիբանանի մէջ նախագահական
ընտրութիւն կատարելու նպատակով: Պատասխանելով Փոփոխութիւն եւ բարեկարգում համախմբումի
նախագահ, երեսփոխան զօր. Միշել Աունի եւ Լիբանանեան ուժեր կուսակցութեան ղեկավար Սամիր
Ժահժահի միջեւ թուիթըրեան հաշիւներու ընդմէջէն արտայայտուած կեցուածքներուն մասին հարցումի
մը` Ռայի պատրիարքը յայտնեց, որ զօր. Աուն եւ Ժահժահ միշտ ալ Պքերքէի երդիքին ներքեւ
եղած են, ինչպէս նաեւ շնորհաւորեց զօր. Աունը անոր 80-րդ տարեդարձին առիթով: