Հալէպի զանազան շրջաններ հրթիռակոծման թիրախ դարձան, ներառեալ Ազիզիէ եւ Պըստան Գըլափ.
կան զոհեր եւ վիրաւորներ։
Քանի մը օրէ ի վեր Հալէպի մէջ եւ արուարձանները սուրիական բանակը զինուորական ծանր գործողութիւններ
կը կատարէ զինեալ խմբաւորումներու վերահսկողութեան տակ գտնուող շրջաններու դէմ: Մինչ
սուրիական բանակը նկատառելի յառաջխաղացք կ՛արձանագրէ Հիւսիսային եւ արեւմտեան արուարձաններուն
մէջ եւ քաղաքը, զինեալ ահաբեկչական խմբաւորումներ թիրախ կը դարձնեն քաղաքի խաղաղ բնակչութիւնը։ Երեքշաբթի
17 Փետրուար 2015-ին, կէսօրէ առաջ զինեալ ահաբեկչական խմբաւորումներու կողմէ հրթիռակոծման
թիրախ դարձան քաղաքի զանազան շրջաններ: Մեծամասնութեամբ քրիստոնեայ եւ հայաբնակ Ազիզիէ
շրջանի «Ֆորեսթա» Գաֆիթերիայի դիմացը եւ անոր մօտ վայրեր հրթիռակոծուեցան: Այս մասին
կը հաղորդէ «Բերիոյ նիւզ»-ը: Միւս կողէ, քաղաքի կեդրոնը գտնուող Պըսթան Գըլափ վաճառախանութներու
շրջանը եւս հրթիռակոծուեցան: Վերոնշեալ շրջանը 5 հրթիռներու (կազի տակարներ) թիրախ դարձաւ:
Նշենք, թէ շրջանի վաճառախանութներէն շատերը կը պատկանին հայերու՝ հրթիռներէն մէկը ինկաւ
արհեստաւորի մը խանութը, բայց բարեբախտաբար չպայթեցաւ, ուրիշ մը «Հարամ» ընկերութեան
մօտ: Հրթիռակոծուեցան նաեւ Մոկամպօ, Թըշրին թաղամասը եւ այլն: Արձակուած հրթիռներու
պայթումին պատճառով արձանագրուեցան 8 զոհեր եւ 36 վիրաւորներ։ Յայտնենք, թէ պայթումները
նիւթական ծանր վնասներ պատճառեցին շրջանի ինքնաշարժներուն, բնակարաններուն եւ խանութներուն։
Իսկ երէկ, Երկուշաբթի 17 փետրուարին, նոյնպէս Հալէպի Սըրիան ալ-Ատիմ շրջանին մէջ ինկած
հրթիռներուն պատճառով արձանագրուեցան բազմաթիւ զոհեր եւ վիրաւորներ: